Sheshesi balasyna jumys surap keledi - Saparbaev
AQTÓBE. QazAqparat - Aqtóbe oblysynyń ákimi Berdibek Saparbaev búgin zııaly qaýym ókilderimen, qoǵamdyq uıym basshylarymen, jergilikti belsendilermen kezdesti. Jastar arasyndaǵy tárbıe men qylmys, qoǵamdaǵy máseleler týraly áńgime qozǵady, dep habarlaıdy QazAqparat tilshisi.
Aqtóbe oblysynda jyl basynan beri 10 myńǵa jýyq qylmystyq is tirkelse, onyń árbir úshinshisi jastardyń qolymen jasalǵan. Al neke qurǵan jastardyń árbir úshinshisi ajyrasyp jatyr. Óńir basshysy Berdibek Saparbaev zııaly qaýymmen kezdesip, úlkenderdiń tárbıege aralasýyn surady. Ári jastar arasynda masyldyq basym.
«Jastardyń arasynda jatyp alyp, aqsha tapqysy keletinderi kóbeıdi. Bári jeńil jolmen júrgisi keledi. 50-60 myń teńgege jumysqa barmaıdy, keıin jumysym joq dep otyrady. Zorǵa júrgen sheshesi kelip, «balamnyń jumysy joq» dep aıtady. Jalqaý, jatypisher bolsaq qalaı damımyz? Eń negizgisi jastardy eńbekke úıretýimiz kerek. «Adamdy adam etken eńbek» degen sóz bar. Jastardyń arasynda qur aıqaı kóbeıip bara jatyr. HHІ ǵasyrda rýshyldyqqa bólinbeýimiz kerek. Bárimiz qazaqpyz»,- dedi oblys ákimi Berdibek Saparbaev.
Aqtóbe oblysy boıynsha «Halyq qaýipsizdigin qamtamasyz etý» jobasy aıasynda 10 myńǵa jýyq is-shara bolyp, 16 myńnan astam adamǵa naqty kómek kórsetildi. Degenmen óńir turǵyndary áli de nemquraıly, aýla ishindegi jumysty jergilikti bılikke artyp qoıady.
«Qala turǵyndary tek synap, suraıdy. Ózderi qoǵamdyq jumysqa qatysyp, óz úlesin qosýdy bilmeıdi. Kógaldandyrý máselesi ózekti. Esik aldyna aǵash, gúl egýge bolady. Aýylda kúldi tazalaýǵa eshkim shyqpaıdy. Qalada da sondaı. Buryn kópqabatty úıdiń turǵyndary birigip, ózderi tazalap, aǵash egetin. Bir aýlaǵa barsam, «qoqysty nege tazalamaısyńdar, qumdy shyǵarmaısyńdar» dep aıtty. Ol kimniń aýlasynda jatyr? Bir aýlanyń adamdary birigip, is qylý kerek. Qoǵamda jaýapkershilik ketip bara jatyr. «Sen tımeseń, men tıme» degen durys emes. Adamdar tek qara basyn, keıde týystaryn ǵana oılaıdy. Aýyldy, týǵan qalasyn kim oılaıdy? Biz ári qaraı qalaı damımyz?»,- dedi Berdibek Saparbaev.
