Sheshenstandaǵy jalańbas áıelder nysanaǵa alynýda
ASTANA. Qyrkúıektiń 30-y. QazAqparat - Sheshen basshysy sheshen áıelderine bastaryna oramal salyp júrýdi mindettep, jarlyq shyǵardy. Sonyń nátıjesinde Sheshenstannyń reseıshil prezıdenti Ramzan Qadyrov «barlyq áıel azamatshalar jumysta bastaryna oramal salyp júrsin, olaı bolmaǵan jaǵdaıda jumystan qýylady», - degen. Sondaı-aq, Ramzan Qadyrov «Men musylmanmyn jáne onyń barlyq dástúr, sharttaryn syılap, qurmetteımin» dep jarlyqta atap kórsetken, dep jazady ınternet basylymdar.
Bıylǵy jyldyń basyna Saýd Arabııasynda qajylyq saparda bolyp kelgen Ramzan Qadyrov: «Groznyıda sheshen áıelderiniń tar djınsı shalbar men tizeden joǵary keletin qysqa kóılek, ıýbka kıip alǵandaryn kórgende esimnen tanyp qala jazdadym», - deıdi.
Osy jarlyq negizinde Reseıdiń Sheshenstan aımaǵyndaǵy kóptegen áıelder Ramazan aıy kezinde oramalsyz júrgeni úshin shabýylǵa tap bolǵan. Turǵyndar men oqıǵaǵa kýá bolǵandardyń aıtýynsha, musylmansha kıingen saqaldy er adamdar kóshede jalańbas júrgen qyz-kelinshekterdi oramal salýǵa májbúrlegen. 38 jastaǵy Marha Atabaeva "Reıters" agenttigine bergen suqbatynda óziniń Groznyıda shabýylǵa tap bolǵan ondaǵan áıeldiń biri ekenin aıtqan. Al, jalańbas áıelderge talap qoıyp júrgen azamattardyń biri aqparat agenttiginiń tilshisine bergen suhbatynda júzdegen áıelge eskertý jasalǵandyǵyn málim etti. Jýrnalısterdiń qoıǵan saýaldaryna Sheshenstannyń máskeýshil jetekshisi Ramzan Qadyrovtyń ókili bul týraly aqparat aıtýdan bas tartyp otyr.
