Sheshenstanda nóser jańbyrǵa baılanysty tótenshe jaǵdaı rejımi engizildi
ASTANA. KAZINFORM - Sheshenstan aýmaǵynda tolassyz jaýǵan nóserge baılanysty tótenshe jaǵdaı rejımi jarııalandy. Tıisti jarlyqqa 29 naýryz, jeksenbi kúni aımaq basshysy Ramzan Qadyrov qol qoıdy, dep jazady DW.
Qatty jaýyn-shashyn saldarynan óńirde elektr jaryǵynyń sóznýi, kópirlerdiń búlinýi, sý basý, topyraq kóshkini men tas qulaý faktileri tirkelgen.
«Groznyı» telearnasynyń málimetinshe, 27 naýryzdan beri tek Shalı aýdanynda 1262 úıdi sý basqan, al Gýdermes aýdanynda 748 turǵyn úı zardap shekken. 29 naýryz keshinde TJ qyzmetiniń qutqarýshylary 557 úıden sý shyǵarǵanyn habarlady.
Sheshenstan úkimeti tóraǵasynyń orynbasary Ahmed Dýdaevtyń aıtýynsha, respýblıkada 30-ǵa jýyq jol men bir bóget shaıylyp ketken. Sonymen qatar 17 kópir, bes gaz qubyry jáne alty transformator zaqymdanǵan. Groznyı jáne Shalı qalalarynyń birneshe aýdany, sondaı-aq Nadterechnyı men Nojaı-ıÝrt aýdandarynyń bir bóligi áli kúnge deıin jaryqsyz otyr.
Buǵan deıin óńirlik TJ qyzmeti Gýdermes aýdanyndaǵy Kýndýhovo kenti men Bragýny aýylynan 1109 adam evakýatsııalanǵanyn habarlaǵan. Eldi mekenderdi uzaqqa sozylǵan jaýyn men ózenderdegi sý deńgeıiniń kóterilýi saldarynan sý basqan.
Nóser jaýyn búkil Soltústik Kavkazdy qamtydy
Qatty jaýyn-shashyn Soltústik Kavkazda 27 naýryzdan bastap jaýa bastady. Eń kóp zardap shekken óńir — Daǵystan. Mahachkala qalasynda bir táýlikte 50 mıllımetrden astam jaýyn-shashyn túsip, bul sońǵy 100 jyldan astam ýaqyttaǵy rekordtyq kórsetkishke aınaldy.
Sý tasqyny saldarynan Daǵystanda 500 myńnan astam adam jaryqsyz qalǵan. Reseı TJM málimetinshe, sý basqan aımaqtardan 3338 adam evakýatsııalanǵan, olardyń 1033-i — balalar.
Osyǵan deıin Daǵystan astanasynda tótenshe jaǵdaı jarııalanǵany týraly jazdyq.
