Sheshenstanda qyz alyp qashqandarǵa aıyp salynatyn boldy
ASTANA. Qazannyń 6-sy. QazAqparat - Sheshen Respýblıkasynda qalyńdyqtyń urlanýynyń aldyn alý maqsatynda buryn-sońdy bolmaǵan sharalar qolǵa alyna bastady,
dep habarlaıdy RBK.
Sheshen Respýblıkasynyń Úkimeti basshysynyń baspasóz qyzmeti habarlaǵandaı, osyndaı málimdemeni respýblıka musylmandarynyń rýhanı basqarmasynyń tóraǵasy Sultan Mırzaev Sheshen eliniń jergilikti jerlerdegi ımamdary men qadılerimen kezdesý kezinde aıtty. Múftıdiń aıtýynsha, qalyńdyqty urlap ketý, qyzǵa qarsy zorlyq aktisi bolyp jáne onyń otbasyn qorlaǵandyq bolyp tabylady. S.Mırzaev atap ótkendeı, mundaı tájirıbe sheshen dástúrine qaıshy kelip, otbasylar arasynda arazdyq pen dúrdarazdyq týdyrady. Bul arazdyq kóp jaǵdaıda birneshe jyldarǵa da sozylyp ketedi.
Qalyńdyqty urlaý Quranǵa jáne Reseı zańdaryna qaıshy keletinin eske sala ketken ol arty qaıǵyǵa dýshar etken bir mysaldy da aıta ketti. Máselen, ótken jyly qyz urlap kele jatqan bir top jigit, qýǵynnan qorqyp, kólikpen qatty jyldamdyqpen kele jatyp, jol-kólik apatynyń oryn alýyna jol berdi. Nátıjesinde, tórt jigit pen urlanǵan qalyńdyq ta oqıǵa ornynda kóz jumdy.
«Endigide qalyńdyq urlaǵany úshin osy qylmysty jasaǵan da, urlanǵan qyzdyń ózin urlaǵan adamǵa turmysqa shyǵýyna zorlyqpen kóndirgen din ókili de jaýapkershilikke tartylatyn bolady. Qyz urlaǵan azamat urlanǵan qyzdyń ata-anasyna keshirim retinde 1 mln. rýbl kóleminde aıyp tóleýi tıis. Al, óziniń bıligin asyra paıdalanyp, qyzdyń ákesine psıhologııalyq qysym kórsetken ımam nemese kadıı óziniń qyzmetinen, sonymen qatar, óziniń rýhanı laýazymynan aıyrylady», - dep málimdedi S.Mırzaev.
Múftıdiń tapsyrmasymen bul sheshim Sheshen Respýblıkasynyń qalalary men aýyldarynyń barlyq turǵyndaryna jetkizilýi tıis. Keńes jumysyna respýblıkanyń 300-den astam ımamdary men kadııleri qatysty.
