Sheshendik óner týraly eki tomdyq kitap jaryq kórdi

ASTANA. QazAqparat - «Qazaq óneriniń antologııasy» jobasy aıasynda «Sheshendik óner» atty eki tomdyq týyndy jaryq kórdi. Kitaptardyń tanystyrylymy búgin, Astanadaǵy Ulttyq kitaphanada ótti, dep habarlaıdy QazAqparat tilshisi.

«Sheshendik óner» (VIII-IX tom) kitabynda qazaq halqynyń sheshendik óneriniń fılosofııalyq mán-maǵynasy jaıynda baıandalady. Ol Elbasynyń «Uly dalanyń jeti qyry» atty maqalasyn qoldaý maqsatynda júzege asyryldy.

«Bizde óner jáne fılologııa mamandaryn daıyndaıtyn oqý oryndary bar. Biraq sondaǵy jastardy oqytatyn qazaq óneriniń tarıhy týraly dúnıeler jutań. Osy olqylyqtyń ornyn toltyrý maqsatynda osydan 5 jyl buryn «Qazaq óneriniń antologııasy» degen 25 tomdyq jobany qolǵa aldym. Buǵan deıin «Qazaq aıtysy» atty jeti tomdyq dúnıe jaryq kórdi. Endigi kezek sheshendik sózder týraly edi. Ol jospar boıynsha bes tomdy quraıdy. Sonyń búgin eki tomynyń tusaýy kesilýde», - dedi memleket jáne qoǵam qaıratkeri, kórnekti ǵalym Myrzataı Joldasbekov.

Onyń aıtýynsha, aldaǵy ýaqytta óner antologııasynyń jalǵasy retinde jyrshy, jyraýlar jáne án men kúılerge arnalǵan týyndylar jaryqqa shyǵatyn bolady. 

Shara barysynda, sondaı-aq M.Joldasbekovtyń «Oıtolǵaý» jáne «Qalyń qazaqtyń qadirlisi» atty jańa týyndylarynyń tusaýy kesildi.

«Oıtolǵaý» kitabynda el men jer taǵdyry, rýhanı mura, kisilik tulǵa týraly naqyl sózder, sondaı-aq avtordyń úzeńgiles dostary, zamandastary men izin qýǵan áriptesteriniń jyly lebizderi berilgen.
 

Al «Qalyń qazaqtyń qadirlisi» kitaby avtordyń ónegeli ómir joly men memleket isindegi qadirli eńbegi týraly baıandaıdy. Sonymen qatar oǵan otandyq jáne sheteldik ǵalymdardyń ǵylymı maqalalary men mazmundy suhbattary engen.

Tusaýkeser rásimine ádebıet, óner jáne tarıh ǵylymdarynyń kórnekti ǵalymdary, Parlament depýtattary jáne etnomádenı birlestikter uıymdarynyń basshylary qatysty.

Eske salsaq, buǵan deıin M.Joldasbekovtyń avtorlyǵymen «Qazaq aıtysynyń» VII tomy kópshilikke tanystyrylǵan bolatyn.