Sheshek indeti saldarynan Grekııada feta óndirisi qysqardy

ASTANA. KAZINFORM – Grekııa qoı arasyndaǵy sheshek indetine baılanysty feta irimshiginiń tapshylyǵy bolýy múmkin ekenin eskertti, dep habarlaıdy Euronews.

Boljam boıynsha, bıyl Grekııada sút jetkiziliminiń azaıýyna baılanysty feta irimshigi shamamen 20 myń tonnaǵa kem óndirilýi múmkin. Buǵan qoı men eshki arasyndaǵy sheshek indetiniń taralýy sebep bolǵan.

Grekııada byltyrdan beri tirkelgen bul indet mal sharýashylyǵy salasyna aýyr soqqy boldy.

Ol ásirese ortalyq óńirlerge qatty áser etip, kóptegen qoı-eshkiniń joıylýyna ákeldi.

Bılik qaýipti aýrýdyń taralýyn toqtatý úshin birqatar shara qabyldap, sonyń ishinde maldy jappaı soıýǵa deıin barǵan. Naýryz aıynyń basyna deıin 480 myńnan astam janýar joıylǵan.

Grek fermerleri alańdaýshylyq pen sharasyzdyqtaryn jasyrmaıdy.

— Biz eki-úsh aı boıy oqshaýlaýda bolamyz. Eger taǵy bir indet bolsa ne bolatynyn bilmeımiz. Onda biz qaıtadan karantınge jabylamyz, qosymsha jem qajet bolady, maldy jaıylymǵa shyǵara almaımyz, al óndiris shyǵyny artady, — deıdi Fermer Sotırıs Stambýlıs.

Fermerler mal basynyń kúrt azaıýy men sút óndirisiniń tómendeýi feta irimshigine úlken qaýip tóndirip otyrǵanyn aıtady. Eýroodaq zańymen shyqqan jerine baılanysty qorǵalatyn bul áıgili irimshik Grekııanyń eń qundy eksporttyq ónimderiniń biri sanalady.

— 500–600 myń qoı qyryldy; sút kólemi aıtarlyqtaı azaıady, sonyń saldarynan feta óndirisi de qatty qysqarady, — dedi Sotırıs Stambýlıs.

Fessalııa aımaǵyndaǵy irimshik óndirýshilerdiń aıtýynsha, bıyl sút óndirisi shamamen 40 paıyzǵa tómendegen. Bul — eldegi feta óndirisiniń negizgi ortalyǵy. Bul óńir Grekııadaǵy jalpy eksporttyń jartysynan astamyn qamtamasyz etedi. Sondyqtan Fessalııadaǵy óndiristik tizbektegi kez kelgen irkilis el ekonomıkasyna tikeleı áser etedi.

— Mal basynyń azaıýy sút jetkizilimin qysqartady. Sút azaıǵandyqtan, biz de feta óndirisin azaıtýǵa májbúrmiz, — deıdi Arvanitis sút fermasynyń ıesi Mıhalıs Arvanıtıs.

Ulttyq feta óndirýshileriniń salalyq uıymynyń baǵalaýynsha, 2026 jylǵa qaraı sút jetkiziliminiń azaıýyna baılanysty feta óndirisinde shamamen 20 myń tonna tapshylyq bolýy múmkin. Salystyrý úshin, 2025 jyly jalpy óndiris kólemi shamamen 140 myń tonna bolǵan.

Aıta ketelik Grekııada eń tómengi jalaqy 920 eýroǵa deıin ósetini týraly jazǵan edik.