Sherzod Hashyrbaev frıstaıl-akrobatıkadan Eýropa kýboginde altyn aldy

ASTANA. KAZINFORM — Qazaqstandyq Sherzod Hashyrbaev frıstaıl-akrobatıkadan Shveıtsarııanyń Aırolo qalasynda ótken Eýropa kýboginiń kezeńinde chempıon atandy.

Sportty damytý dırektsııasynyń baspasóz qyzmetinen málim etkenindeı, 20 jastaǵy Sh.Hashyrbaev 96.93 upaımen aldyna jan salmady.

Ýkraınalyq Maksım Kýznetsov (94.82 upaı) ekinshi, shveıtsarııalyq Pırmın Verner (93.99) úshinshi orynǵa ıe boldy. 

Sherzod Hashyrbaev jarys barysynda eki dúrkin álem chempıony Noe Rozdy (Shveıtsarııa) qapy qaldyrdy.

Bul – Sherzodtyń eresekter arasyndaǵy ekinshi úlken tabysy. Buǵan deıin ol 2021 jyly AQSh-ta ótken Soltústik Amerıka kýboginde úzdik shyqqan edi.

Aıta keteıik, Sherzod Hashyrbaev Beıjiń olımpıadasynda baq synaǵan bolatyn.