Sherzattyń ólimi: Qamaýǵa alynǵan kúdiktiniń týystary málimdeme jasady
QONAEV. KAZINFORM – Talǵardaǵy 16 jastaǵy Sherzat Bolattyń ólimine qatysty kúdikti dep tanylǵandardyń týystary vıdeoúndeý joldady.
Qamaýǵa alynǵandardyń týystary halyqtan keshirim surady. Sonymen birge olar marqumnyń ákesi men aǵasy da jaýapqa tartylýy kerek ekenin alǵa tartty.
Olardyń aıtýynsha, qarýdy alǵashqy bolyp Sherzattyń aǵasy Nurqanat alyp shyqqan. Sondaı-aq olar Sherzattyń sol jerdegi jigitterdiń biriniń jaǵyn syndyrǵanyn aıtady.
«Qarýdy birinshi Nurqanat kóliginen alyp shyqqan. Balalarǵa qaraı oq atqan. Balalar tynysh turǵan jerinen Sherzat marqum bir balanyń jaǵyn syndyrdy. Oılamaǵan jerden uryp jibergen. Ózderi myltyq pen pyshaq alyp shyqqan. Sodan jigitter kóterilip ketken. Keshirim suraımyz balalarymyz úshin. Bizdiki durys emes. Biraq balalardy arandatpasa barlyǵy tynysh sheshilip, barlyǵy úıine ketetin edi. Olar Sherzatty óltiremiz dep barǵan joq», – deıdi vıdeoúndeý joldaǵan áıel.
Vıdeoúndeý jasaǵandar Sherzattyń ákesin halyqty dúrliktirip, jalǵan aqparat taratty dep aıyptap otyr.
«Qarjaýbaı basynan bastap ótirik aıtty. Qarjaýbaı pyshaq alyp keldi me, jigitshe moıyndasyn. Qarjaýbaıdy da qamasyn. Qarjaýbaıdyń áıeli me, qaryndasy ma Nurqanat atqan oqtardy jerden terip alǵan. Ol da jaýapkershilikke tartylsyn. Ashyq sot bolsa bárine birdeı bolsyn. Biz sony talap etimiz», – deıdi kúdiktilerdiń týystary.
Eske salaıyq, 4 qazanda Talǵar qalasyndaǵy tóbelesten bir adam qaıtys bolǵanyn jazǵanbyz.
Ashýly talǵarlyqtar jasóspirim ólimine baılanysty narazylyqqa shyqty.
12 qazan túnde qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.
Keıin Іshki ister mınıstrliginiń ókilderi BAQ qyzmetkerlerine Sherzat Bolat qaza tapqan jerde kameraǵa túsip qalǵan vıdeony kórsetti.
Prokýratýra sottyń ashyq ótýin suraıtyndaryn jetkizdi.
