Sherzattyń anasy «balam, balam» dep onyń denesin japty — kýáger

TALDYQORǴAN. KAZINFORM — Sherzat isinde taǵy bir kýáger Nargıza Nezamedınova jaýap berdi. 

Sherzat Polattyń isi boıynsha ótip jatqan sotta kýá Nargıza Nezamedınova, eń birinshi anasynyń aıqalaǵan daýsyn estigenin jetkizdi.

— Sherzattyń anasy «balam, balam» dep onyń denesin jaýyp jatty. Men qyzyl kepka kıgen, aryqtaý kelgen adamnyń Sherzatty uryp jatqanyn kórdim, — dedi Nezamedınova.

Sondaı-aq, ol úıdiń terezesinen sary shashty bir qyzdyń jigitpen dúkenge qaraı ketip bara jatqanyn kórgenin málimdedi.

Aıta keteıik, aıyptalýshylar oryndyǵynda toǵyz adam bar, olardyń biri kámeletke tolmaǵan.

Buryn sotta Sherzattyń aǵasy Nurqanat Ǵaıypbaevtyń tergeý kezindegi beınejazbasy kórsetildi. 

Sonymen qatar oqıǵa ornyna alǵash barǵan polıtseıler kýálik berdi. 

Oǵan deıin sot otyrysynda kýáger Elmıra Nurbekova jaýap berdi.

Ekinshi kýáger qyz Dana Jaqsygeldi oqıǵa týraly baıandady. 

Sotta Sherzattyń ákesi Qarjaýbaı Nurymov ol kıkiljiń qalaı bastalǵanyn aıtqan edi. 

Eske salaıyq, prokýror oqıǵanyń tolyq hronologııasyn baıandady. 

Byltyr 4 qazan kúni tóbelesten 16 jastaǵy jasóspirim qaıtys bolǵanyn jazǵan edik. 

2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady. 

2024 jyldyń jeltoqsan aıynda Talǵar mańynda Sherzat Polattyń aǵasynyń denesi tabyldy.