Sherzattyń ákesine qatysty is qozǵalmady — mınıstr

ASTANA. KAZINFORM — QR Іshki ister mınıstri Erjan Sadenov Sherzattyń ákesine qatysty is qozǵalmaǵanyn aıtty. 

Búgin Parlament Májilisinde tilshiler Sherzat Polattyń ákesi Qarjaýbaı Nurymovqa qatysty qylmystyq is qozǵalǵany týraly aqparat qanshalyqty shyndyqqa janasatynyn surady.

— Jalpy, bul jóninde resmı saýal jiberińizder. Jalpy aıtaıyn, Qarjaýbaıǵa qatysty qazir qylmystyq is joq, — dedi Erjan Sadenov.

Eske salsaq, jaqynda Bas prokýrordyń orynbasary Áset Shyndalıev Májilistiń jalpy otyrysynan keıin jýrnalısterdiń suraǵyna bergen jaýabynda Sherzat isine baılanysty sottyń qalaı ótkeni týraly paıymyn aıtty. 

Bıyl 3 maýsymda sot otyrysynyń jaryssóz kezeńinde sottalýshy Nurbol Toqtaýbaev óz oıyn aıtty. Ol sońǵy sózinde Sherzat Polattyń ólimine Qarjaýbaı Nurymovty kúdikti dep tanýdy ótindi. 

5 maýsymda Jetisý oblysynyń qylmystyq ister jónindegi mamandandyrylǵan aýdanaralyq sotynda 16 jastaǵy Sherzat Polattyń ólimine qatysty qylmystyq is boıynsha úkim jarııalandy.