Sherzattyń aǵasynyń ólimine qatysty tergeý nelikten toqtady - prokýratýranyń jaýaby

QONAEV. KAZINFORM - Almaty oblysynyń prokýratýrasy Kazinform saýalyna jaýabynda Nurqanat Ǵaıypbaevtyń ólimine qatysty tergeý nelikten toqtaǵanyn túsindirdi.

Oblystyq prokýratýra jaýabyna sáıkes, Almaty oblysy polıtsııa departamentiniń tergeý basqarmasy N.Ǵaıypbaevtyń ólimi boıynsha QR Qylmystyq kodeksiniń 105-baptyń 1-bóligimen (ózin-ózi óltirýge deıin jetkizý) tirkelgen qylmystyq is aıasyndaǵy sotqa deıingi tergep-tekserýdi aıaqtaǵan.

- Sotqa deıingi tergep-tekserý barysynda oqıǵanyń barlyq mán-jaılaryn jan-jaqty, tolyq jáne obektıvti anyqtaý úshin qajetti tergeý áreketteri júrgizildi. Jınalǵan dálelder, saraptama qorytyndylary jáne ózge de materıaldar negizinde N.Ǵaıypbaevtyń ólimi ózine-ózi qol salý (sýıtsıd) saldarynan bolǵany anyqtaldy. Úshinshi tulǵalardyń yqpalymen ózine-ózi qol salýǵa ıtermeleý faktileri anyqtalǵan joq. Sol sebepti, tergeý organymen osy jyldyń 17 maýsymynda sotqa deıingi tergep-tekserý QPK-niń talaptaryna sáıkes toqtatyldy, - delingen prokýratýra jaýabynda.

Eske salaıyq, buǵan deıin Sherzattyń aǵasy Ǵaıypbaevtyń ólimine qatysty tergeý toqtatylǵanyn jazǵanbyz.

Byltyr 4 qazan kúni tóbelesten 16 jastaǵy Sherzat Polat qaza boldy.

2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.

2024 jyldyń jeltoqsan aıynda Talǵar mańynda Sherzat Polattyń aǵasy óli tabyldy.

Sherzat ólimine qatysty 9 adam 23 jyldan 1,5 jylǵa deıin sottaldy.

Sottalǵan Dýman Ysqaq jazasyn óteýine baılanysty bostandyqqa shyqty. Al is boıynsha apellıatsııalyq sot 18 tamyz kúni saǵat 11:00–de oblystyq sot ǵımaratynda ótedi.