Sherzattyń aǵasynyń ólimi: oqıǵadan buryn marqum týystaryna habarlama jibergen
QONAEV.KAZINFORM - Almaty oblysynyń Polıtsııa departamenti máıiti tabylǵan 30 jastaǵy er adam ólimine qatysty tyń derektermen bólisti.
Almaty oblysy PD bastyǵynyń birinshi orynbasary Baǵdat Áshimovtyń aıtýynsha, marqum Sherzat Polattyń aǵasy óz-ózine qol salar aldynda týysyna WhatsApp jelisi arqyly habarlama jibergen.
— Tergeý barysynda marqum týystarynyń birine ózine-ózi qol jumsaý týraly messendjerde jibergen jazbasy anyqtaldy. Habarlamada ol týysqandarymen qoshtasyp, jıeniniń janyna jerleýdi surady, — deıdi Baǵdat Áshimov.
Eske salaıyq, buǵan deıin Talǵar mańynda Sherzat Polattyń aǵasy óli tabylǵanyn jazǵanbyz. Atalǵan jaǵdaı boıynsha polıtsııa qylmystyq is qozǵaldy.
Eske salaıyq, 4 qazan kúni tóbelesten 16 jasar jasópirim qaıtys bolǵanyn jazǵanbyz.
Keıin ashýly talǵarlyqtar jasóspirim ólimine baılanysty narazylyqqa shyqty.
Іshki ister mınıstri Erjan Sádenov Almaty oblysy Talǵar aýdanyndaǵy jasóspirimniń ólimine qatysty isti jeke baqylaýyna aldy.
12 qazan túnde qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.
15 qazan kúni Talǵar qalasynyń ákimi Bahyt Qýatbekuly Kúrishbekov, Talǵar qalasy ákiminiń orynbasary Matan Saǵyndyq óz mindetterin tıisti deńgeıde atqarmaǵany úshin laýazymdarynan bosatyldy. Artynsha, Talǵar aýdany ákimi apparatynyń basshysy Aslan Qasymbaev qyzmetinen qýyldy.
Іshki ister mınıstrliginiń ókilderi BAQ qyzmetkerlerine Sherzat Polat qaza tapqan jerde kameraǵa túsip qalǵan vıdeony kórsetti.