Sherzat sotynda aıyptalýshylar men jábirlenýshilerdi bettestirý sáti jarııalandy

TALDYQORǴAN. KAZINFORM — Sherzat Polattyń ólimine qatysty qylmystyq is boıynsha kezekti sot otyrysynda aıyptalýshy jáne jábirlenýshi tarap arasyndaǵy bettestirý beınejazbasy usynyldy. Tyńdalym barysynda aıǵaqtar men beınematerıaldarda sáıkessizdikter baıqaldy.

Aldymen sotqa Shyńǵys Belǵojaevtyń oqıǵa kezinde marqum Sherzatty qalaı urǵany týraly aıtqan beınejazbasy kórsetildi.

Beınetaspada ol Nurqanatqa qol kótermegenin málimdeıdi.

— Men shatasyp qaldym, myltyq atqan balany urdym dep oıladym, sóıtsem Sherzatty uryp jiberippin. Maǵan deıin álgi balaǵa pyshaq suǵylyp qoıǵan eken. Men Sherzatty jabýly pyshaqtyń sabymen urdym, — deıdi sottalýshy Shyńǵys Belǵojaev beınejazbada.

Kelesi beınematerıalda Azamat Toqtaýbaev tergeý barysynda jalǵan aqparat taratylǵanyn jáne ózine Shyńǵys Belǵojaev tarapynan qysym kórsetilgenin aıtqan.

Sondaı-aq, sotta marqumnyń anasy Azamat Toqtaýbaevtyń qolynda pyshaq bolǵanyn kórgenin jáne onyń Sherzat jerde jatqanda uryp jatqanyn baıqaǵanyn jetkizdi.

Alaıda Azamat Toqtaýbaev oqıǵa ornynda túsirilgen beınejazbada óziniń sol sátte bolmaǵany anyq kórinetinin aıtyp, sýdıadan bul derekti nazarǵa alýdy surady.

Sonymen qatar Darhan Áskentaıdyń tergeý kezindegi beınejazbasy kórsetildi. Onda ol balalar kelgennen keıin janjal bastalyp ketkenin, eshkimge tóbelesýge nemese kúsh qoldanýǵa buıryq bermegenin aıtqan.

Aıta keteıik, búgingi sotta Qarjaýbaı Nurymovtyń qolynda qandaı pyshaq bolǵany jaıly jazǵanbyz.

Osyǵan deıin Abzal Shynasyl sottalýshylardyń bireýi Sherzatqa pyshaq salǵanyn málimdegen edi.

Sherzat isindegi basty aıyptalýshy osyǵan deıingi sózinen bas tartty. 

Eske sala keteıik, Sherzat Polattyń ólimine qatysty sotta taǵy bir sottalýshy aıyptaý aktisimen kelispeıtinin aıtqan.