Sherzat sotynda aıyptalýshy pyshaqtyń kimde bolǵanyn aıtty
TALDYQORǴAN. KAZINFORM — Jetisý oblysynyń mamandandyrylǵan aýdanaralyq sotynda qaralyp jatqan Sherzat Polattyń ólimine qatysty qylmystyq is boıynsha sottalýshy Ravıl Sakıev jaýap berdi.
Sotta Sakıev 2024 jyly oqıǵa bolǵan kúni dosy Nurqııaspen birge «Eıforııa» meıramhanasyna barǵanyn aıtty.
Sol jerde ol bir kún buryn tanysqan Dana jáne Elmıra esimdi qyzdardy shaqyrǵan. Biraz ýaqyttan keıin olardyń janyna Abzal qosylyp, keshki saǵat 21:00 shamasynda qyzdar da kelgen.
Otyrys barysynda Azamat pen Shyńǵys, sondaı-aq Azamattyń aǵasy Nurbol men Dýman da meıramhanaǵa kelip-ketken.
Sakıevtiń aıtýynsha, meıramhana jabylar ýaqytta ol eseptesip, Elmıramen birge sońǵy bolyp syrtqa shyqqan. Qyzdardy úıine jetkizip salýǵa nıettengen ol, barlyǵy Shyńǵystyń kóligine otyryp, qala ishinde júrip kele jatqanda «Qamajaı» dúkenine toqtaǵan. Sol sátte kóliktegilerdiń eshqaısysy oǵan Nurboldyń bireýmen eregeskeni jóninde eskertpegen.
— Men dúkenge keldik dep oıladym. Kólikten túskene bir jaǵdaıdyń bolyp jatqanyn baıqadym. Sol jerde Nurqanat Ǵaıypbaev maǵan jaqyndap, «meniń inim Sherzat senderdiń bir balalaryńdy urypty» dep Darhandy kórsetti. Men ol adamdy tanymaıtynymdy, bul oqıǵaǵa qatysym joǵyn aıttym, — dedi sottalýshy.
Sakıevtiń sózine qaraǵanda, dúken mańynda týyndaǵan janjaldyń sońy tóbeleske ulasqan. Sol sátte belgisiz tustan oq atylyp, ol qarańǵy jaqqa qaraı júgirgen.
— Myltyq atyldy degende júgirip baryp, jerde jatqan bótelkeni aldym. Sol kezde Nurqanattyń taǵy da myltyqty oqtap jatqanyn kórdim. «Myltyǵyńdy tasta!» dedim. Ol ekinshi ret atty. Men kóliktiń artyna tyǵylyp, bótelkeni laqtyrdym, tımedi. Keıin taǵy myltyqty oqtap jatqanyn kórip, júgirip baryp myltyqqa jarmastym. Sol sátte ol myltyqty tartyp qalyp, men quladym… Nurqanatty eki-úsh ret teptim. Sol sátte bir áıel adamnyń qatty daýsy shyqty. Sodan keıin kapıýshonymdy kıip, birinshi bolyp oqıǵa ornynan ketip qaldym. Artymnan basqalary bir mınýt bolmaı júgirip kelip, kóliktiń aldyna otyrdy. Myltyqty Abzal men Azamattyń aldyna salǵanyn kórdim. «777» dúkeninde men kólikten túspedim. Abzal sol jerde maǵan «bir balany pyshaqtap jiberdim» dedi, keıin onyń Nurqanat ekenin bildim, — dep eske alady sottalýshy.
Kelesi sot otyrysy 2025 jyldyń 21, 22, 23 mamyrynda saǵat 10:00–de ótedi.
Eske sala keteıik, Sherzat Polattyń ólimine qatysty búgingi sotta taǵy bir sottalýshy aıyptaý aktisimen kelispeıtinin aıtqan.
Taǵy bir sottalýshy Nurqııas Іlııasov myltyqpen urý sebebin túsindirse, Azamat Toqtaýbaev ótirik aıǵaq bergenin rastady.
Kámeletke tolmaǵan taǵy bir aıyptalýshy Dýman Ysqaq ózine taǵylǵan aıypty moıyndamady.
Aıta keteıik, Sherzat Polattyń ólimi boıynsha alǵashqy sot otyrysynda prokýror oqıǵanyń tolyq hronologııasyn baıandady.
Byltyr 4 qazan kúni tóbelesten 16 jastaǵy jasópirim qaza bolǵanyn jazǵan edik.
2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.
2024 jyldyń jeltoqsan aıynda Talǵar mańynda Sherzattyń aǵasy Nurqanat Ǵaıypbaevtyń denesi tabyldy.