Sherzat soty: jasóspirimniń ájesi oqıǵa qalaı bolǵanyn aıtty

TALDYQORǴAN. KAZINFORM — Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda Sherzat Polattyń ólimine baılanysty sot otyrysy ótip jatyr. 

Sot otyrysy barysynda jábirlenýshi, Sherzattyń ájesi Jumabıke Kadırova byltyr 4 qazan kúni bolǵan oqıǵanyń qalaı bolǵanyn baıandady.

Jábirlenýshiniń aıtýynsha, ol saǵat 23:00 shamasynda jumystan kelip úıde otyrǵanynda, kelininiń telefonyna Qarjaýbaıdan qońyraý kelip túsken. Ol «Sherzat bireýdi uryp qoıdy, soǵan Nurqanatty oıatyp jiber» dep aıtqan.

— Kelinim Nurqanatty oıatty, ol telefonmen Qarjaýbaımen sóılesti da, tez kıinip ketti. Sherzat qolymda tárbıelengen nemerem. Tynyshtyq emes ekenin bilip, kelinime aıtyp, izinshe shyǵyp kettik. Taksımen magazınge bardyq. Kólikten túsip jatyp, Sherzatty izdedim, ol kóringen joq. Barǵan sebebim onda balalar úıilip tur dep oılamadym. Bireýdi uryp qoısa, men ájesi retinde keshirim suraıyn dedim. Óıtip myltyqpen, pyshaqpen keletinin bilgende úıde otyryp-aq polıtsııaǵa habarlasatyn edim, — dedi Jumabıke Kadırova.

Jábirlenýshiniń sózinshe, ári qaraı ol joldan ótken boıda sottalýshylar bir jaqqa júgirgen. Al olardyń aldynan shyqqan Kadırovany Abzal Shynasyl ıterip qulatqan.

— «Áı, balalar» dep aldarynan shyqqan kezimde kók sportıvkadaǵy Abzal bar kúshimen tartyp jiberdi, qolymda telefonym ushyp, qulap qaldym. Onyń Abzal ekenin Nurqanat aıtty. Kelinimdi eki bala qolynan ustap, jibermeı qoıdy. Men bul balalardyń (sottalýshylar) eshqaısysyn tanymaımyn. Balalardyń (Nurqanat jáne Sherzat) qulaǵanyn kórgen joqpyn, bular topyrlap ketip bara jatqan kezde, eki bala da jerden sulap jatqan eken. Tek Gúlbara ony qushaqtap, «skoryı» dep aıqaılap jatty. Bular Nurqanatty da, Sherzatty da óltirdik dep ketken adamdar jáne óltirý úshin kelgen adamdar, — dedi ol.

Sot otyrysy barysynda Sherzattyń ájesi kóz jasyna erik berdi.

— Ornymnan tura almaı jattym, biraq basymdy kóterip qarasam, Sherzatqa sol jerge barǵan adamnyń bári qol kóterdi. Eske túsirý de ońaı emes, óltirgen adamdarǵa qaraý da ońaı emes, — dedi jábirlenýshi.

Sondaı-aq sózinde Jumabıke Kadırova oqıǵa ornynda sottalýshylarmen birge bolǵan eki qyzdyń is-áreketin de eske aldy.

— Eki qyz boldy, olar maǵan «skoryı shaqyrmaısyz ba» dep aıtqanyn bilemin. Túrlerin tanymaımyn. Olar qalyp qoıatyn sekildi balalar (sottalýshylar) qoldarynan ustap, kólikke alyp ketti, — dedi Jumabıke Kadırova.

Eske salaıyq, buǵan deıin sotta Sherzat óliminiń negizgi sebebi ataldy.

Sondaı-aq Nurqanat Ǵaıypbaevtyń janjal barysynda qandaı jaraqat alǵany aıtyldy.

Prokýror oqıǵanyń tolyq hronologııasyn baıandady.

Aıyptalýshylardyń kópshiligi kináni moıyndaǵan joq.

Byltyr 4 qazan kúni tóbelesten 16 jastaǵy jasópirim qaıtys bolǵanyn jazǵan edik. 

2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.