Sherzat soty: sottalýshylar sońǵy sózin aıtyp jatyr
TALDYQORǴAN. KAZINFORM — Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda Sherzat Polattyń ólimine baılanysty sot otyrysynda jaryssóz ótip jatyr.
Búgin jaryssózde aıyptalýshylar sońǵy sózin aıtyp jatyr. Olardyń arasynda birinshi bolyp Darhan Áskentaı sóz aldy.
— Qurmetti sot, meniń sol jerde bolǵanym jáne dosyma habarlasqanym ras. Men Nurboldy kek alý maqsatynda shaqyrmadym. Іstegen is-áreketim jáne beınematerıaldy qarasańyz, men eshkimge qol kótermedim, eshkimdi teppedim jáne qolymda pyshaq bolmady. Men Nurboldy shaqyrǵanyma ókinemin. Jazym jaǵdaı bolyp, tóbeles bolyp ketetinin kim bilgen. Osy oqıǵaǵa sebepshi bolǵan jábirlenýshi Qarjaýbaı birinshi Sherzatqa men týraly jalǵan aqparat berip jáne ekinshi balalar kelgende agressııa tanytpaǵanda mundaı tóbeles bolmas edi. Bul jerde tóbeles bastaǵan, adamdar tobyn qurǵan jáne pyshaq pen qarý daıyndaǵan Qarjaýbaıǵa QR Zańymen maǵan taǵaıyndalǵan 293-baptyń 3-tarmaǵyn taǵaıyndaýyńyzdy suraımyn, — dedi Darhan Áskentaı.
Aıyptalýshylar arasynda ekinshi bolyp sottaǵy sońǵy sózin Ravıl Sákıev aıtty.
— Men sotqa deıingi tergeý barysynda da, sot barysynda da Nurqanatqa 2-3 márte aıaqpen soqqy jasaǵanymdy moıyndaǵanmyn. Sol úshin Kadırova Jumabıke apadan keshirim suraımyn. Qurmetti sot, men aıyptaý aktisi boıynsha QR Qylmystyq kodeksiniń 293-baby 3-bóligi, 24-bap 3-bóligi, 99-bap 2-bóligi 7, 9-tarmaqtary boıynsha aıyptalyp otyrmyn. Men Nurqanat Ǵaıypbaevqa soqqy jasaǵanymdy moıyndaımyn jáne ol úshin shyn júrekten ókinemin. Ol aıypty (99-bap) maǵan qandaı dáleldermen taǵyp otyrǵanyn bilmeımin. Nurqanat birinshi bergen jaýabynda maǵan pyshaqty Azamat saldy degen. Ekinshisinde Nurqııas saldy degen. Ol menimen bettestirý kezinde meni 2017 jyldan beri tanımyn dep aıtqan. Ol meni bireýmen shatastyryp alýy múmkin emes. Men bettestirýde Nurqanat Ǵaıypbaevqa myltyq jaıly aıtqan kezde, ol «pyshaqty sen saldy» dep aıtam dedi. Qurmetti sot, men pyshaq salsam, ondaı aýyr qylmys istesem, «júr polıtsııaǵa baraıyq» dep aıtpas edim. Meniń qolymda pyshaq bolǵan joq. Beınebaqylaýda kórgenderińizdeı men onymen (N.Ǵaıypbaev) sóılesip turmyn. Sol kezde art jaǵynda tóbeles bastaldy. Men myltyq atylǵan kezde ashýlanyp, ony 2-3 márte teptim. Ol úshin keshirim suraımyn jáne shyn júrekten ókinemin. Sol bettestirýge deıin maǵan eshqandaı aıyp taqpaı, sodan keıin meni aıtyp ketti. Qarjaýbaı myrza sotqa kelip shyndyǵyn aıtty, «men kórgen joqpyn» dedi. Men ol aıyppen kelispeımin, tek ózim istegen isti moıyndaımyn. Meniń is-áreketimdi QR Qylmystyq kodeksiniń 293-baby 3-bóligimen qaraýdy suraımyn, — dedi Ravıl Sákıev.
Eske salaıyq, keshe prokýror 7-23 jyl arasynda jaza surady.
Sonymen qatar prokýror kýáger qyzdardyń is-áreketin qaıta tekserýdi alǵa tartty.
Al sottalýshynyń advokaty Sherzattyń ákesine qatysty is qozǵaýdy ótindi.