Sherzat soty: sýdıa blogerler men áleýmettik jeli qoldanýshylaryna eskertý jasady
TALDYQORǴAN. KAZINFORM - Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda Sherzat Polattyń ólimine baılanysty sot otyrysy ótip jatyr.
Sot otyrysynyń basynda sýdıa Erjan Januzaqov blogerlerge jáne áleýmettik jeli qoldanýshylaryna eskertý jasady.
- Qurmetti sot otyrysyna qatysýshylar, áleýmettik jelilerde iske múldem qatysy joq blogerler men basqa da azamattar tergeý áreketteri men sot talqylaýyna qatysty jeke pikirin bildirip, sýbektıvti baǵa berip jatyr. Osyǵan baılanysty QR Konstıtýtsısynyń 75-babynyń 1 tarmaǵyna sáıkes, Qazaqstan Respýblıkasynda sot tóreligin tek sot júzege asyratynyn, sonymen qatar sot qyzmetine qandaı da bir aralasýǵa jol berilmeıtinin jáne ol zańda belgilengen tártipte jaýapkershilikke ákep soǵatynyn esterińizge salamyz, - dedi sýdıa.
Sonymen qatar Erjan Januzaqov is qaralyp bitip, úkim shyǵyp, ol zańdy kúshine engenge deıin sot protsessin túsindirýge, ásirese oǵan quqyqtyq baǵa berýge jol berilmeıtinin eskertti.
- Sot sheshimdi obektıvti, daýsyz dálelder negizinde qabyldaıdy. Úkim shyqqanǵa deıin sotqa qysym jasaýǵa, negizsiz jáne dálelsiz syn aıtýǵa jol berilmeıdi. Іske qatysty sýbektıvti pikir taratýǵa bolmaıdy. Bul keı jaǵdaılarda sotqa qysym jasaý áreketi retinde baǵalanýy múmkin. Osyǵan baılanysty blogerler men basqa da jeli qoldanýshylaryna arandatýshylyq sıpattaǵy áreketterden aýlaq bolýǵa shaqyramyz. Sot obektıvti ári negizdelgen úkim shyǵaratynyna kepildik beredi, - dedi sot.
Eske salaıyq, ótken sot otyrysynda aıyptalýshy Darhan Áskentaıdan jaýap alyndy.
Sot barysynda sottalýshylardyń advokattary prokýrordy aýystyrýdy ótindi. Biraq sýdıa prokýrordy aýystyrýdan bas tartty.
Sonymen qatar sotta dúken kamerasyna túsken oqıǵanyń tolyq beınejazbasy kórsetildi.
Alǵashqy sot otyrysynda prokýror oqıǵanyń tolyq hronologııasyn baıandady.
Byltyr 4 qazan kúni tóbelesten 16 jastaǵy jasópirim qaıtys bolǵanyn jazǵan edik.
2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.
2024 jyldyń jeltoqsan aıynda Talǵar mańynda Sherzat aǵasynyń denesi tabyldy.