Sherzat soty: Sottalýshy ótirik aıǵaq bergenin moıyndady

TALDYQORǴAN. KAZINFORM — Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda Sherzat Polattyń ólimine qatysty sot otyrysy ótip jatyr.

Búgingi sot otyrysynda kúdikti Azamat Toqtaýbaevtan jaýap alynyp jatyr.

Memlekettik aıyptaýshy «Qamajaı» dúkeniniń aldynda túsirilgen beınejazbany qosýdy surady. Onda memlekettik aıyptaýshy Azamat Toqtaýbaevtyń is-qımylyna mán berdi.

Sottalýshy óz kezeginde dúkenniń aldynda Nurqanatpen amandasqanyn, jaǵdaıdyń mán-jaıyn bilýge tyrysqanyn alǵa tartyp, tóbeleske barmaǵanyn atap ótti.

Aıyptalýshynyń sózinshe, kıkiljiń barysynda Darhan Áskentaıǵa ashýly bolǵan. Sondyqtan osy jaǵdaı boıynsha ótirik aıǵaq bergen.

— Darhan jaıly qarama-qaıshy jalǵan aıǵaq berdim. Sebebi ol kezde Darhanǵa ashýly edim. Bizben birge jazaǵa tartylsyn dep ózimmen birge ala ketkim keldi. Darhannyń qatysy joq, ol eshkimdi urmady, qolynda eshqandaı pyshaq bolǵan joq. Men ótirik aıǵaq berdim, sol úshin qazir ókinemin, — dedi Azamat Toqtaýbaev.

Eske sala keteıik, Sherzat Polattyń ólimi boıynsha alǵashqy sot otyrysynda prokýror oqıǵanyń tolyq hronologııasyn baıandady.

Byltyr 4 qazan kúni tóbelesten 16 jastaǵy jasópirim qaza bolǵanyn jazǵan edik.

2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.

2024 jyldyń jeltoqsan aıynda Talǵar mańynda Sherzat aǵasynyń denesi tabyldy.