Sherzat soty: prokýror 7-23 jyl arasynda jaza surady

TALDYQORǴAN. KAZINFORM — Jetisý oblysynyń qylmystyq ister jónindegi mamandandyrylǵan aýdanaralyq sotynda 16 jastaǵy Sherzat Polattyń ólimine baılanysty sot otyrysynda jaryssóz ótip jatyr.

Іs boıynsha aıyptalýshylar ornynda 9 adam otyr. Memlekettik aıyptaýshy Dana Sársenbaı aıyptalýshy Abzal Shynasylǵa 23 jyl, al Ravıl Sákıevke 20 jyl jaza taǵaıyndaýdy surady. Sottalýshylar Darhan Áskentaı, Nurbol Toqtaýbaev, Shyńǵys Belǵojaev, Dıdar Qalıahmetke 7 jyl, Nurqııas Іlııasovqa ótelmegen jazany ishinara qosý arqyly túpkilikti 9 jyl, Azamat Toqtaýbaevqa ótelmegen jazany ishinara qosý arqyly túpkilikti 15 jyl, Dýman Ysqaqqa 1 jyl 6 aı jaza surady.

Aıyptalýshylarǵa kelesideı aıyp taǵylǵan:

— Abzal Shynasyl Qylmystyq kodekstiń 293-baby 3-bóligi (buzaqylyq), 99-bap 2-bóligi 5, 9, 14-tarmaqtary (adam óltirý), 24-bap 3-bóligi (qylmysqa daıyndalý jáne qylmysqa oqtalý), 99-bap 2-bóligi 1, 7, 9 tarmaqtary.

— Ravıl Sákıev Qylmystyq kodekstiń 293-baby 3-bóligi (buzaqylyq), 24-bap 3-bóligi (qylmysqa daıyndalý jáne qylmysqa oqtalý), 99-bap 2-bóligi 1, 7, 9-tarmaqtary (adam óltirý);

— Shyńǵys Belǵojaev, Nurqııas Іlııasov, Darhan Áskentaı, Nurbol Toqtaýbaev, Dıdar Qalıahmet, Azamat Toqtaýbaev Qylmystyq kodekstiń 293-baby 3-bóligi (buzaqylyq).

— Azamat Toqtaýbaev Qylmystyq kodekstiń 188-baby 1 bóligi (bótenniń múlkin jymqyrý).

— Kámeletke tolmaǵan Dıdar Ysqaq Qylmystyq kodekstiń 434-baby (qylmys týraly habarlamaý) boıynsha aıyp taǵylyp otyr.

Alǵashqy sot otyrysynda prokýror oqıǵanyń tolyq hronologııasyn baıandady. 

Byltyr 4 qazan kúni tóbelesten 16 jastaǵy jasópirim qaıtys bolǵanyn jazǵan edik. 

2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady. 

2024 jyldyń jeltoqsan aıynda Talǵar mańynda Sherzat aǵasynyń denesi tabyldy.