Sherzat soty: Nurqanat Ǵaıypbaevtyń jaraqatyna qatysty saraptama málimetteri jarııalandy
TALDYQORǴAN. KAZINFORM — Búgin Jetisý oblysynyń qylmystyq ister jónindegi mamandandyrylǵan aýdanaralyq sotynda Sherzat Polattyń ólimine qatysty qylmystyq is boıynsha kezekti ashyq sot otyrysy ótip jatyr.
Sot protsesi barysynda sot-medıtsınalyq sarapshy Ómirbek Jolymbetov marqum Nurqanat Ǵaıypbaevtyń oqıǵa kezinde alǵan jaraqattaryna qatysty túsinik berdi.
Sarapshynyń aıtýynsha, syrttaı tekserý kezinde Ǵaıypbaevtyń sol jaq kóz qabaǵynda uzyndyǵy 3 jáne 1,5 sm bolatyn qantalaý, sondaı-aq oń qulaq qalqanynda uqsas qantalaý anyqtalǵan. Oǵan qosa jelke jáne jambas tusynda jaraqattar baıqalǵan.
Sot-medıtsınalyq saraptama qorytyndysyna sáıkes, Ǵaıypbaevqa jabyq bas mı jaraqaty, mı shaıqalýy, jelke tusynyń qantalaýy, keýde tusynyń jabyq jaraqaty, oń jaq bóksesinde birneshe shanshyla-kesilgen jara, sondaı-aq bet, mańdaı, shyntaq pen tize aımaǵyndaǵy kógerýler syndy dene jaraqattary dıagnozy qoıylǵan.
Saraptama barysynda Nurqanat Ǵaıypbaevtyń janbasynda úsh shanshyla-kesilgen jaraqat anyqtalǵan. Deneniń zaqym alǵan aımaǵynda iri qan tamyrlary joq. Osyǵan oraı olar jeńil dene jaraqattary retinde baǵalanǵan.
— Sot-medıtsınalyq saraptama kezinde jaraqattardyń ólshemi 1,0 jáne 0,1 sm, 0,8 jáne 0,1 sm, 1,2 jáne 0,1 sm boldy. Atalǵan jaralar medıtsınalyq jolmen óńdelgen. Men Ǵaıypbaevty oqıǵadan jeti kún ótken soń tekserdim. Sondyqtan usynylǵan medıtsınalyq qujattarda jaraqattyń naqty tereńdigin kórsetetin derekter bolmady, — dedi sarapshy sotta.
Alaıda ol sózinde, anatomııalyq qurylymǵa saı bul jaraqattardyń tereńdigi shamamen 0,5–1 sm bolýy múmkin. Sarapshy zaqymdanýlardyń barlyǵy qysqa ýaqyt aralyǵynda bir zatpen salynǵanyn atap ótti.
Eske salaıyq, Prokýror sottalýshylardyń árqaısysyna QR Qylmystyq kodekstiń qaı baptary boıynsha aıyp taǵylǵanyn atap ótti.
— Abzal Shynasyl Qylmystyq kodekstiń 293-baby 3-bóligi (buzaqylyq), 99-bap 2-bóligi 1,4,7, 9,14-tarmaqtary (adam óltirý), 24-bap 3-bóligi (qylmysqa daıyndalý jáne qylmysqa oqtalý);
— Ravıl Sákıev Qylmystyq kodekstiń 293-baby 3-bóligi (buzaqylyq), 24-bap 3-bóligi (qylmysqa daıyndalý jáne qylmysqa oqtalý), 99-bap 2-bóligi 7,9-tarmaqtary (adam óltirý);
— Shyńǵys Belǵojaev, Nurqııas Іlııasov, Darhan Áskentaı, Nurbol Toqtaýbaev, Dıdar Qalıahmet, Azamat Toqtaýbaev Qylmystyq kodekstiń 293-baby 3-bóligi (buzaqylyq).
— Kámeletke tolmaǵan Dıdar Ysqaq Qylmystyq kodekstiń 434-baby (qylmys týraly habarlamaý) boıynsha aıyp taǵylyp otyr.
Aıta keteıik, oqıǵa boıynsha memlekettik saraptama qortyndysy jarııalanǵanyn jazǵanbyz.
Sondaı-aq, Sherzat sotynda aıyptalýshylar men jábirlenýshilerdi bettestirý sáti kórsetilgen bolatyn.