Sherzat soty: Nurqanat Ǵaıypbaevtyń janjal barysynda qandaı jaraqat alǵany aıtyldy
TALDYQORǴAN. KAZINFORM — Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda 16 jastaǵy Sherzat Polattyń ólimine baılanysty basty sot otyrysy ótip jatyr.
Sot otyrysy barysynda prokýror aıyptaý aktisin oqyp, Sherzat Polattyń aǵasy Nurqanat Ǵaıypbaev byltyr 3-inen 4 qazanǵa qaraǵan túni bolǵan tóbeles kezinde qandaı jaraqat alǵanyn aıtty.
— 2024 jyldyń 11 qazan kúni № 447-24-17 sot medıtsınalyq saraptama qorytyndysyna sáıkes, Ǵaıypbaevtyń atyna berilgen medıtsınalyq qujattardyń derekteri boıynsha kelesi dıagnoz qoıylǵan: jabyq mı jaraqaty, bas mıdyń shaıqalýy, basty jelke bóliginiń qantalaýy, keýde músheleriniń jabyq jaraqaty, oń jaqtaǵy bóksedegi birneshe suǵylǵan-kesilgen jara, bet, mańdaı, shyntaq, tizeniń kógerýi túrindegi dene jaraqattary anyqtaldy, — dedi memlekettik aıyptaýshy.
Aldyn ala tyńdaý kezinde prokýror sottalýshylardyń árqaısysyna QR Qylmystyq kodekstiń qaı baptary boıynsha aıyp taǵylǵanyn atap ótti.
Eske salaıyq, byltyr 4 qazan kúni tóbelesten 16 jastaǵy jasópirim qaıtys bolǵanyn jazǵan edik.
Keıin ashýly talǵarlyqtar jasóspirim ólimine baılanysty narazylyqqa shyqty.
2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.
2024 jyldyń jeltoqsan aıynda Talǵar mańynda Sherzat Polattyń aǵasy óli tabyldy.
Bıyl aqpan aıynda Sherzat isine qatysty qylmysty tergeý aıaqtaldy. Qylmystyq is 62 tomnan turady. Tergeý barysynda 40 sot saraptamasy júrgizilip, shamamen 200 kýágerden jaýap alynǵan.
Bas prokýrordyń orynbasary Ǵalymjan Qoıgeldıev Sherzat Polattyń úıiniń órtenýine qatysty tergeýdiń jańa málimetterin aıtty.