Sherzat soty: Qarjaýbaı Nurymovtyń qolynda qandaı pyshaq bolǵan

TALDYQORǴAN. KAZINFORM – Sherzat Polattyń ólimine qatysty qylmystyq is boıynsha sot otyrysy ótip jatyr. Búgingi tyńdalymda sot materıaldaryn zerdeleý jumystary jalǵasty.

Sot barysynda memlekettik aıyptaýshy tergeý kezinde anyqtalǵan derekterdi jarııa etti. Sondaı-aq sot otyrysynda kýáger Dana Jaqsykeldi tergeý kezinde bergen beınejazba arqyly tyńdaldy.

Kýágerdiń aıtýynsha, tóbeles dúkenniń aldynda bastalǵan jáne oqıǵa bolǵan jerde myltyqtan basqa sýyq qarý kórmegenin aıtty. Alaıda «777» dúkeniniń aldynda Abzal Shynasyldyń qolynda pyshaq bolǵanyn rastady.

– Abzal maǵan «qolyma dızzı» quıyp jibershi» dedi. Sol sátte onyń qolynan úshkir pyshaqty baıqadym, – dedi kýáger Dana.

Sotta jábirlenýshi Qarjaýbaı Nurymovtyń beınejazbasy da kórsetildi. Onda Nurymov aıyptalýshy Nurqııastyń qolynda myltyq bolǵanyn, ol myltyqpen Sherzat Polatty uryp jatqanyn kórgenin málimdedi. Sonymen qatar Nurboldyń qolynda da pyshaq bolǵanyn aıtyp, keıin ózi de pyshaq alǵanyn jetkizdi. Onyń aıtýynsha, dúken ishinde basqa pyshaq bolmaǵan.

Beınejazbada Nurymovtyń qolyndaǵy pyshaq naqty kórsetilgen. Saraptama qorytyndysyna sáıkes, pyshaqtyń jalpy uzyndyǵy – 30 sm, eni – 2 sm.

– Nurbol pyshaq alyp shyqqan soń, men de qolyma pyshaq aldym. Biraq bul sát beınejazbaǵa túsip qalmady, – dedi Qarjaýbaı Nurymov.

Degenmen, kórsetilim kezinde sottalýshylardyń biri Nurymovtyń qolyndaǵy pyshaqtyń dál sol pyshaq emes, sary tústi bolǵanyn atap ótti.

Osyǵan deıin Abzal Shynasyl sottalýshylardyń bireýi Sherzatqa pyshaq salǵany jaıly málimdegen bolatyn.

Aıta keteıik, aıyptalýshy pyshaqty kórdim, biraq ózimdi ǵana qorǵaýǵa tyrystym degen edi.

Abzal Shynasyl kimdi pyshaqtaǵanyn aıtty.

Sherzat isindegi basty aıyptalýshy osyǵan deıingi sózinen bas tartqany jaıly jazǵan bolatynbyz.

Eske sala keteıik, Sherzat Polattyń ólimine qatysty sotta taǵy bir sottalýshy aıyptaý aktisimen kelispeıtinin aıtqan.