Sherzat soty: qandy oqıǵa kezinde sottalýshy Ravıl Sakıevtiń qolynda pyshaq boldy ma
TALDYQORǴAN. KAZINFORM — Sherzat Polattyń ólimine qatysty qylmystyq is boıynsha sot protsesi jalǵasyp jatyr. Búgingi otyrysta sot materıaldaryn zerdeleý jalǵasty.
Sot tyńdalymy barysynda marqum Nurqanat Ǵaıypbaev pen aıyptalýshy Ravıl Sakıevtiń bettestirý beınejazbasy kórsetildi.
Beınetaspada marqum Nurqanat oqıǵa barysyn bylaısha baıandaǵan.
— Biz Nurbol Toqtaýbaevpen aqsha máselesi boıynsha sóılesip turǵanbyz. Osy kezde Mercedes kóligimen birneshe adam keldi. Ravıl meni jeke shaqyryp aldy. Jaǵdaı shıelenise bastaǵanda Mahmet Ahmetti Nurqııas pen Abzal uryp jibergenin baıqadym. Sol sátte Nurqııas meni ura bastady, biraq urǵany maǵan tımedi. Ravıl Sakıev te meni urdy. Oqıǵa janjalǵa ulasty. Osy kezde Sherzat maǵan kelip «boldy, keteıikshi» dedi. Men oǵan «qasha ber» dedim. Sherzat menen 10 metr jerge baryp «Nurqanat aǵa» dep aıqaılap, qulady. Men janyna kelgenimde, onyń pyshaq jaraqatyn alǵanyn kórdim. Aýzynan qan ketip jatty. Men «Toqtańdar, jedel járdem shaqyraıyq» dep aıqaıladym, biraq olar mán bermedi. Jaǵdaı ýshyǵyp bara jatqanyn sezip, Sherzatty qushaqtap jatqanymda, Shyńǵys kelip meniń shekemnen tepti. Keıin Ravıl Sherzattyń shekesinen tepti. Men Ravıl Sakıevtiń pyshaq ustap júgirip kele jatqanyn anyq kórdim, — dedi ol.
Aıyptalýshy Ravıl Sakıev jábirlenýshiniń aıtqanymen kelispeıtinin aıtty.
Sottalýshynyń qorǵaýshysy marqum Nurqanat Ǵaıypbaevtyń tergeý barysynda bergen jaýaptarynda qarama-qaıshylyqtar bar ekenin aıtty.
— Buǵan deıingi oqıǵa ornyn tekserý jáne jaýaptardy naqtylaý barysynda marqum Ǵaıypbaev sottalýshy Sakıevtiń qolynda pyshaq bolmaǵanyn, tek synǵan bótelke bolǵanyn aıtqan. Sondaı-aq, jambas tusynan pyshaqpen jaraqattaǵan kúdikti retinde Abzal Shynasyldy ataǵan edi, — dedi advokat.
Eske sala keteıik, buǵan deıin memlekettk aıyptaýshy sottalýshylardyń árqaısysyna Qylmystyq kodekstiń qaı baptary boıynsha aıyp taǵylǵanyn aıtqan edi.
— Abzal Shynasyl Qylmystyq kodekstiń 293-baby 3-bóligi (buzaqylyq), 99-bap 2-bóligi 1,4,7, 9,14-tarmaqtary (adam óltirý), 24-bap 3-bóligi (qylmysqa daıyndalý jáne qylmysqa oqtalý);
— Ravıl Sákıev Qylmystyq kodekstiń 293-baby 3-bóligi (buzaqylyq), 24-bap 3-bóligi (qylmysqa daıyndalý jáne qylmysqa oqtalý), 99-bap 2-bóligi 7,9-tarmaqtary (adam óltirý);
— Shyńǵys Belǵojaev, Nurqııas Іlııasov, Darhan Áskentaı, Nurbol Toqtaýbaev, Dıdar Qalıahmet, Azamat Toqtaýbaev Qylmystyq kodekstiń 293-baby 3-bóligi (buzaqylyq).
— Kámeletke tolmaǵan Dıdar Ysqaq Qylmystyq kodekstiń 434-baby (qylmys týraly habarlamaý) boıynsha aıyp taǵylyp otyr.
Aıta ketelik, Qarjaýbaı Nurymovtyń qolynda qandaı pyshaq bolǵany jaıly jazǵanbyz.
Osyǵan deıin Abzal Shynasyl sottalýshylardyń biri Sherzatqa pyshaq salǵany jaıly aıtqan.
Sherzat isindegi basty aıyptalýshy osyǵan deıingi sózinen bas tartqany jaıly jazǵan bolatynbyz.