Sherzat soty: ekinshi kýáger qyz Dana Jaqsygeldi oqıǵa týraly baıandady

TALDYQORǴAN. KAZINFORM — Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda Sherzat Polattyń ólimine baılanysty sot otyrysy ótip jatyr.

Sot otyrysynda byltyr 3-inen 4-shi qazanǵa qaraǵan túni oqıǵa ornynda bolǵan kýáger Dana Jaqsygeldi sóz sóıledi. Ol oqıǵa qalaı bolǵanyn baıandady.

Onyń aıtýynsha, Ravıl Sákıevtiń shaqyrýymen kýáger Elmıra Nurbekovamen birge meıramhanaǵa barǵan. Onda aıyptalýshylardyń birnesheýi bolǵan.

— Úıge qaıtamyz degende «aparyp tastaımyz, biraq jolda dúkenge kireıik» dedi. Bizde de temeki bitip qalǵan edi. Sóıtip dúken aldynda bir top adam turdy. Keıin biz dúkenge temeki alýǵa kirdik. Biraq bizge «satpaımy» dedi. Sosyn biz shyqtyq, sol kezde ereges bastalyp ketti. Men kóliktiń artyna kettim. Sol kezde atys bastaldy. Sur kıim kıgen saqaldy jigit birinshi aspanǵa, sosyn eki ret bizge qaraı oq atty. Keıin tóbeles kósheniń arǵy betine ketip qaldy. Men kóliktiń ishinde otyryp, 5 mınýttan keıin shyǵyp uldarǵa «qaıtaıyq» dep aıqaıladym. Ol kezde eshkim estigen joq. Qaıtyp kólikke otyrdym. Tóbeles ne úshin bastalǵanyn bilmedim, — dedi Dana Jaqsygeldi.

Prokýror kýágerden «102», «103»-ke nelikten habarlaspaǵanyn surady.

— Ondaı oıymda bolǵan joq. Bir jaǵynan myltyqty ómirimde birinshi ret kórdim. Sodan keıin qorqyp, kólikte otyryp qaldym. Óz ómiri úshin qoryqtym, — dedi ol.

Buǵan deıin sotta kýáger Elmıra Nurbekova jaýap berdi.

Ótken aptada sotta Sherzattyń ákesi Qarjaýbaı Nurymov ol kıkiljiń qalaı bastalǵanyn aıtqan edi.

Sondaı-aq Qarjaýbaı Nurymov Sherzattyń qashan jan tapsyrǵanyn aıtty.

Sherzattyń anasy Gúlbara Beıshembıeva da qaıǵyly oqıǵa qalaı bolǵanyn eske aldy.

Eske salaıyq, prokýror oqıǵanyń tolyq hronologııasyn baıandady. 

Aıyptalýshylardyń kópshiligi kináni moıyndaǵan joq.

Byltyr 4 qazan kúni tóbelesten 16 jastaǵy jasópirim qaıtys bolǵanyn jazǵan edik. 

2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady. 

2024 jyldyń jeltoqsan aıynda Talǵar mańynda Sherzat Polattyń aǵasy óli tabyldy. 

Bıyl aqpan aıynda Sherzat isine qatysty qylmysty tergeý aıaqtaldy. Qylmystyq is 62 tomnan turady. Tergeý barysynda 40 sot saraptamasy júrgizilip, shamamen 200 kýágerden jaýap alynǵan.