Sherzat soty: aıyptalýshynyń advokaty isti prokýrorǵa qaıtarýdy surady
TALDYQORǴAN. KAZINFORM - Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda Sherzat Polattyń ólimine baılanysty sot otyrysy ótip jatyr.
Sot otyrysy barysynda Nurbol Toqtaýbaev pen Azamat Toqtaýbaevtyń advokaty isti prokýrorǵa qaıtarýdy surady.
- Meniń qorǵaýymdaǵy Nurbol Toqtaýbaev pen Azamat Toqtaýbaevqa qatysty qylmystyq is qujattarynda olardy kúdikti dep taný týraly qaýly múldem joq. Bul Qylmystyq-protsestik kodekstiń 64-babyna sáıkes, kúdikti retinde taný týraly qaýly shyǵaryp, ol prokýrormen kelisýi qajet jáne Qylmystyq-protsestik kodekstiń 202-babyna sáıkes ony kúdikti dep taný qaýly shyǵarylǵan sátten bastap eseptelinedi. Alaıda bul qylmystyq is materıaldarynda kúdikti retinde taný týraly qaýly bolmaǵandyqtan, onyń protsessýaldyq mártebesi anyqtalmaǵan. Bul kúdiktige qatysty qylmystyq qýdalaýdyń zańdy belgilengen tártibi saqtalmaı bastalǵanyn kórsetedi. Eger kúdikti retinde resmı tanylmaı turyp, jaýap alynǵan bolsa, bul áreketter zańsyz dep esepteledi. Sondyqtan is qosymsha tergep-tekserý úshin jáne zańbuzýshylyqtardy joıý úshin prokýrorǵa qaıtarýdy suraımyn, - dedi qorǵaýshy.
Bul ótinishti sottalýshylardyń advokattary qoldasa, memlekettik aıyptaýshylar men jábirlenýshilerdiń qorǵaýshylary qanaǵattandyrýǵa qarsy boldy.
Sýdıa Erjan Januzaqov eki taraptyń pikirin tyńdaǵan soń, bul ótinishti qanaǵattandyrmaý týraly sheshim shyǵardy.
- Toqtaýbaev Azamat jáne Toqtaýbaev Nurbol, sonymen qatar Qalıahmet QR Qylmystyq kodeksiniń 131-babyna sáıkes, ustalǵan adamdar bolǵandyqtan, olarǵa qatysty zań bólek qaýly shyǵarýdy talap etpeıdi. Sondyqtan bul sotqa deıingi tergep-tekserý organynyń is-áreketteri zańdy dep tanylady, - dedi sot.
Eske salaıyq, sýdıa blogerler men áleýmettik jeli qoldanýshylaryna eskertý jasady.
Ótken sot otyrysynda aıyptalýshy Darhan Áskentaıdan jaýap alyndy.
Sot barysynda sottalýshylardyń advokattary prokýrordy aýystyrýdy ótindi. Biraq sýdıa prokýrordy aýystyrýdan bas tartty.
Sonymen qatar sotta dúken kamerasyna túsken oqıǵanyń tolyq beınejazbasy kórsetildi.
Alǵashqy sot otyrysynda prokýror oqıǵanyń tolyq hronologııasyn baıandady.
Byltyr 4 qazan kúni tóbelesten 16 jastaǵy jasópirim qaıtys bolǵanyn jazǵan edik.
2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.
2024 jyldyń jeltoqsan aıynda Talǵar mańynda Sherzat aǵasynyń denesi tabyldy.