Sherzat soty: aıyptalýshylardyń kópshiligi kináni moıyndaǵan joq
TALDYQORǴAN. KAZINFORM — Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda 16 jastaǵy Sherzat Polattyń ólimine baılanysty basty sot otyrysy ótti.
Sot otyrysy barysynda sýdıa Erjan Januzaqov 9 sottalýshydan aıyptaý aktisindegi taǵylǵan aıyp boıynsha kináni moıyndaıtyn ne moıyndamaıtynyn surady.
Sherzat Polat ólimine baılanysty bas kúdikti A.Shynasyl kinásin jartylaı moıyndaıtynyn aıtty. Ol N.Ǵaıypbaevqa qatysty is-áreketterin rastady. Alaıda Sh.Polatqa pyshaq suqqanyn joqqa shyǵardy.
Belǵojaev kinásin jartylaı moıyndaıtynyn aıtty. Onyń sózinshe, sottalýshy jasóspirimdi pyshaq sabymen urmaǵan.
A.Toqtaýbaev pen N.Toqtaýbaev ta kinálaryn tek jartylaı moıyndaıtyndaryn habarlady.
R.Sákıev, D.Áskentaı, N.Іlııasov, D.Qalıahmet, D.Ysqaq kinásin tolyq moıyndaǵan joq.
Eske salaıyq, prokýror sot otyrysynda olardyń árqaısysyna Qylmystyq kodekstiń qaı baptary boıynsha aıyp taǵylǵanyn oqydy.
Olar:
— Abzal Shynasyl Qylmystyq kodekstiń 293-baby 3-bóligi (buzaqylyq), 99-bap 2-bóligi 1,4,7, 9,14-tarmaqtary (adam óltirý), 24-bap 3-bóligi (qylmysqa daıyndalý jáne qylmysqa oqtalý);
— Ravıl Sákıev Qylmystyq kodekstiń 293-baby 3-bóligi (buzaqylyq), 24-bap 3-bóligi (qylmysqa daıyndalý jáne qylmysqa oqtalý), 99-bap 2-bóligi 7,9-tarmaqtary (adam óltirý);
— Shyńǵys Belǵojaev, Nurqııas Іlııasov, Darhan Áskentaı, Nurbol Toqtaýbaev, Dıdar Qalıahmet, Azamat Toqtaýbaev Qylmystyq kodekstiń 293-baby 3-bóligi (buzaqylyq).
— Kámeletke tolmaǵan Dıdar Ysqaq Qylmystyq kodekstiń 434-baby (qylmys týraly habarlamaý) boıynsha aıyp taǵylyp otyr.
Buǵan deıin sotta Sherzat óliminiń negizgi sebebi ataldy.
Sondaı-aq Nurqanat Ǵaıypbaevtyń janjal barysynda qandaı jaraqat alǵany aıtyldy.
Prokýror oqıǵanyń tolyq hronologııasyn baıandady.
Byltyr 4 qazan kúni tóbelesten 16 jastaǵy jasópirim qaıtys bolǵanyn jazǵan edik.
2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.
2024 jyldyń jeltoqsan aıynda Talǵar mańynda Sherzat Polattyń aǵasy óli tabyldy.
Bıyl aqpan aıynda Sherzat isine qatysty qylmysty tergeý aıaqtaldy. Qylmystyq is 62 tomnan turady. Tergeý barysynda 40 sot saraptamasy júrgizilip, shamamen 200 kýágerden jaýap alynǵan.