Sherzat soty: 4 qazan kúni bolǵan janjal beınejazbasy jarııalandy

TALDYQORǴAN. KAZINFORM - Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda Sherzat Polattyń ólimine baılanysty sot otyrysy ótip jatyr.

Búgin sot barysynda Qamajaı dúkeniniń ishki beınekamerlary túsirgen beınerolıkter kórsetildi. Odan keıin Talǵar turǵynynyń óz úıinen túsirgen janjaldyń beınejazbasy jarııalandy. Onda sottalýshylardyń jábirlenýshilerge soqqy jasap jatqany anyq kórinedi.

Beınejazba kópshilikke kórsetilgennen keıin advokat aıyptalýshy Darhan Áskentaıdan osy jazbadaǵy óz áreketin túsindirýdi surady.

- Nurbol (sottalýshy) Nurqanat Ǵaıypbaevqa bara jatqan kezde men artynan bardym. Ári qaraı «qoı» dep Nurboldy aldym da, balalardy ajyrattym. Osy ýaqytta Abzal Shynasyl (sottalýshy) men eki ret uryp jiberedi. Sol jaq mańdaıymnan urdy, - dedi Darhan Ásketaı.

Sýdıanyń «seni ne úshin urdy» degen suraǵyna aıyptalýshy «shatastyryp alǵan shyǵar, ol balalardy sol kúni ǵana kórdim» dep jaýap berdi.

Eske salaıyq, sýdıa blogerler men áleýmettik jeli qoldanýshylaryna eskertý jasady.

Ótken sot otyrysynda aıyptalýshy Darhan Áskentaıdan jaýap alyndy. 

Sot barysynda sottalýshylardyń advokattary prokýrordy aýystyrýdy ótindi. Biraq sýdıa prokýrordy aýystyrýdan bas tartty.

Sonymen qatar sotta dúken kamerasyna túsken oqıǵanyń tolyq beınejazbasy kórsetildi.

Alǵashqy sot otyrysynda prokýror oqıǵanyń tolyq hronologııasyn baıandady. 

Byltyr 4 qazan kúni tóbelesten 16 jastaǵy jasópirim qaıtys bolǵanyn jazǵan edik. 

2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady. 

2024 jyldyń jeltoqsan aıynda Talǵar mańynda Sherzat aǵasynyń denesi tabyldy.