Sherzat isine baılanysty sot qashan bastalatyny belgili boldy

QONAEV.KAZINFORM - Almaty oblysynyń soty atyshýly is boıynsha sot otyrysy qashan bastalatynyn habarlady.

Resmı málimetke sáıkes, is boıynsha aldyn ala tyńdaý 10 sáýir saǵat 12:00-de Jetisý oblysy, Taldyqorǵan qalasy, Qablısa jyraý kóshesi, №65 mekenjaıynda ornalasqan Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda ótedi.

- Ashyq sot otyrysynyń ótýi taǵaıyndaldy, - dep habarlady oblystyq sot.

Eske salaıyq, byltyr 4 qazan kúni tóbelesten 16 jastaǵy jasóspirim qaıtys bolǵanyn jazǵanbyz. 

Keıin ashýly talǵarlyqtar jasóspirim ólimine baılanysty narazylyqqa shyqty. 

2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady. 

15 qazan kúni Talǵar qalasynyń ákimi Bahyt Kúrishbekov, Talǵar qalasy ákiminiń orynbasary Matan Saǵyndyq óz mindetin tıisti deńgeıde atqarmaǵany úshin laýazymynan bosatyldy. Artynsha, Talǵar aýdany ákimi apparatynyń basshysy Aslan Qasymbaev qyzmetinen qýyldy. 

2024 jyldyń jeltoqsan aıynda Talǵar mańynda Sherzat Polattyń aǵasy óli tabyldy. 

Keıin Azat aýylynda jerleý rásimin ótkizý kezinde qoǵamdyq tártipti buzǵany úshin Sherzat Polattyń ákesi Qarjaýbaı ustalǵanyn jazǵanbyz. 

Bıyl aqpan aıynda Sherzat isine qatysty qylmysty tergeý aıaqtalǵany habarlandy. Qylmystyq is 62 tomnan turady.