Sherzattyń otbasy 660 mln teńge moraldyq ótemaqy talap etti
TALDYQORǴAN. KAZINFORM – Jetisý oblysynyń qylmystyq ister jónindegi mamandandyrylǵan aýdanaralyq sotynda 16 jastaǵy Sherzat Polattyń ólimine baılanysty qozǵalǵan qylmystyq is boıynsha ashyq sot otyrysy jalǵasyp jatyr.
Sot barysynda jábirlenýshi taraptyń ókili advokat Meıirman Shekeev oqıǵa ornynda bolǵan Elmıra Nurbekova men Dana Jaqsygeldige qatysty jeke qaýly shyǵarýdy surady. Sot tóraǵasy ótinishhatty ashyq qaldyryp, sheshimdi keńesý bólmesinde qabyldaıtynyn aıtty.
Sonymen qatar qorǵaýshy azamattyq talap aryz jarııalap, kelesi ótemaqylardy óndirýdi talap etti:
1. Shynasyl Abzaldan – Qarjaýbaı Nurymovtyń paıdasyna ulynyń jerleý rásimine ketken 2 794 000 teńge kóleminde materıaldyq shyǵyndy óndirý;
2. Shynasyl Abzal jáne Ravıl Sakıevten ortaqtasyp – Qarjaýbaı Nurymovtyń paıdasyna moraldyq zııan retinde 100 mıllıon teńge kóleminde ótemaqy óndirý;
3. Shynasyl Abzal jáne Ravıl Sakıevten ortaqtasyp – Gúlbara Bıshimbaevanyń paıdasyna moraldyq zııan úshin 100 mıllıon teńge óndirý;
4. Shynasyl Abzal jáne Ravıl Sakıevten ortaqtasyp – Jumabıke Qadırovanyń paıdasyna moraldyq zııan úshin 100 mıllıon teńge óndirý;
5. Belǵojaev Shyńǵys, Áskentaı Darhan, Ilıasov Nurqııas, Toqtaýbaev Nurbol, Toqtaýbaev Azamat jáne Qalıahmet Dıdardan úlestik túrde – Qarjaýbaı Nurymovtyń paıdasyna árqaısynan 20 mıllıon teńgeden, jalpy 120 mıllıon teńge kóleminde moraldyq zııandy óndirý;
6. Osy alty azamattan Gúlbara Bıshimbıevaǵa – árqaısynan 20 mıllıon teńgeden, jalpy 120 mıllıon teńge kóleminde moraldyq zııandy óteý;
7. Sondaı-aq atalǵan azamattardan Jumabıke Qadırovaǵa – árqaısynan 20 mıllıon teńgeden, jalpy 120 mıllıon teńge kóleminde moraldyq ótemaqy óndirý suraldy.
Advokat moraldyq zııan boıynsha talaptardyń psıhologııalyq zertteý qorytyndylaryna negizdelgenin atap ótti. Sonymen qatar jerleý rásimine jumsalǵan shyǵyndardyń túbirtekteri de talap aryzǵa qosymsha retinde tirkeldi.
Sotqa tóraǵasy Erjan Januzaqov atalǵan azamattyq talap aryzdy qabyldady. Atap aıtqanda jáberlenýshiler Nurymov, Kadırova, Bıshimbıeva osy qylmystyq is boıynsha azamattyq talapker retinde tanýǵa, Sottalýshylar Shynasyl A., Sakıev R., Belǵojaev Sh.,, Áskentaı D., Ilıasov N., Toqtaýbaev N., Toqtaýbaev A. jáne Qalıahmet D. azamatyq jaýapker retinde tanýǵa qaýly etti. Sondaı-aq sýdıa sottalýshylardy QR QPK 74-babyndaǵy azamattyq jaýapkerdiń quqyqtaryn túsindirdi.
Aıta keteıik, buǵan deıin aıǵaq retinde tárkilengen beınejazba jarııalanǵanyn jazǵanbyz.
Sonymen qatar sýdıaǵa jarııalanǵan qarsylyq qabyldanbady.
Prokýror oqıǵanyń tolyq hronologııasyn baıandady.