Sherzat isi: ýaqytsha ustaý ızolıatorynyń basshysy qyzmetinen bosatyldy
QONAEV. KAZINFORM — Sherzat Polattyń ólimine qatysty kúdiktilerdiń túrmede týǵan kún toılaǵan vıdeosy áleýmettik jelide tarǵan bolatyn. Osydan keıin jaýaptylar jumystan qýylyp, baqylaý kúsheıtildi.
Іshki ister mınıstrliginiń málimetinshe, Almaty oblysy Eńbekshiqazaq aýdanyny ýaqytsha ustaý ızolıatoryndaǵy jaǵdaı boıynsha tekserý júrgizildi.
— Vıdeony ýaqytsha ustaý ızolıatorynyń burynǵy qyzmetkeri túsirgeni anyqtaldy. Ol bul úshin jeke uıaly telefonyn paıdalanǵan. Qyzmettik tártipti óreskel buzǵany úshin ol arnaıy sheninen aıyrylyp, jumystan qýyldy,— delingen habarlamada.
Sonymen qatar atalǵan fakti boıynsha qylmystyq is qozǵaldy.
— Qyzmettik tártipti óreskel buzǵany jáne tıisinshe baqylaý júrgizbegeni úshin 16 basshy men qyzmetker laýazymnan bosatylýǵa deıin qatań tártiptik jazaǵa tartyldy. Onyń ishinde ÝUI basshysy da laýazymnan bosatyldy,— dep atap ótti mınıstrlikten.
Bolǵan jaǵdaıǵa baılanysty ÝUI-de rejımdi baqylaý kúsheıtildi: qosymsha beınemonıtorıng sharalary engizilip, uqsas mekemelerde jospardan tys tekserýler bastaldy.
Osyǵan deıin áleýmettik jelide 16 jastaǵy jasóspirim Sherzat Polattyń ólimine qatysty is boıynsha ustalǵandar ýaqytsha ustaý ızolıatorynda týǵan kún toılap jatqany týraly vıdeo paıda bolǵan edi.
Osyǵan deıin Sherzat Polattyń ólimine qatysty is sotqa qashan joldanatyny týraly jazǵan edik.
Eske salaıyq, byltyr 4 qazan kúni tóbelesten 16 jasar jasópirim qaıtys bolǵanyn jazǵanbyz.
Keıin ashýly talǵarlyqtar jasóspirim ólimine baılanysty narazylyqqa shyqty.
2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.
15 qazan kúni Talǵar qalasynyń ákimi Bahyt Qýatbekuly Kúrishbekov, Talǵar qalasy ákiminiń orynbasary Matan Saǵyndyq óz mindetterin tıisti deńgeıde atqarmaǵany úshin laýazymdarynan bosatyldy. Artynsha, Talǵar aýdany ákimi apparatynyń basshysy Aslan Qasymbaev qyzmetinen qýyldy.
Byltyr jeltoqsan aıynda Talǵar mańynda Sherzat Polattyń aǵasynyń denesi tabyldy.
Keıin Azat aýylynda jerleý rásimin ótkizý kezinde qoǵamdyq tártipti buzǵany úshin Sherzat Polattyń ákesi Qarjaýbaı ustalǵanyn jazǵanbyz.