Sherzat isi: Sottalǵandardyń týysy jaýapkershilikke tartyldy

TALDYQORǴAN. KAZINFORM –  Úkim jarııalanǵannan keıin sottalǵandardyń týystary sot úkimine narazylyq tanytyp, qoǵamdyq tártipti buzýǵa árekettendi.

Oqıǵa sot zaly men onyń mańynda tirkeldi. Jetisý oblystyq Polıtsııa departamenti habarlaǵandaı, quqyq buzýshylyqtyń joly der kezinde kesildi. Balaǵat sózder aıtyp, agressııa tanytqan áıel adam ákimshilik jaýapkershilikke tartyldy.

Vedomstvonyń málimetinshe, sot protsesi ótken aýmaqta qoǵamdyq tártip pen qaýipsizdik tolyq qamtamasyz etilgen.

- Quqyq ústemdigine qandaı da bir qysym kórsetýge jol berilmeıdi. Sot aktileriniń oryndalýyna kedergi keltirý, sotqa qurmetsizdik tanytý nemese jaǵdaıdy turaqsyzdandyrýǵa baǵyttalǵan áreketter zań talaptaryna sáıkes qatań túrde toqtatylady, – delingen resmı habarlamada.

Aıta keteıik, Sherzat isi boıynsha aıyptalýshylarǵa qandaı jaza taǵaıyndalǵany jaıly jazǵanbyz.

Sonymen qatar sottalýshylar ótemaqy tóleýge mindettelgenin jazǵanbyz.