Sherzat isi: sotta oqıǵa ornyna alǵash barǵan polıtseıler kýálik berdi

TALDYQORǴAN. KAZINFORM – Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda Sherzat Polattyń ólimine baılanysty sot otyrysy ótip jatyr.

Sot otyrysynda 4 qazan kúni oqıǵa ornyna birinshi bolyp barǵan patrýldik polıtsııa qyzmetkerleri kýáger retinde jaýap berdi. Talǵar aýdany polıtsııa basqarmasynda rota patrýldik polıtsııa qyzmetkeri Jánibek Ámiraqynnyń aıtýynsha, olar sol túni kúdikti Darhan Áskentaıdy ustaǵan.

- 4-i kúni saǵat 00:42 shamasynda jedel kezekshiniń nusqaýy boıynsha Talǵar qalasy Mendeleev kóshesine «tóbeles bolyp jatyr» dep habarlama tústi. Sol jerge 7-8 mınýt aralyǵynda bardym. Ony Іshki ister mınıstrligi tekserip, GPS arqyly dáleldengen. Barǵanda joldyń ortasynda Ravon avtokóligin kórdim. Ári qaraı Rýstavellı kóshesine qaraı burylys bar, sol jaqta bir top adammen sóılestim. Mán-jaıdy bildim. Odan keıin jerdegi qandy kórdim. Adamdar «bir bala pyshaqtalǵan, ony ákesi emhanaǵa alyp ketti» dedi. Taǵy suraıyn bastaǵan kezde Golf jáne Mercedes-Benz kólikteri týraly aıtty. Onyń barlyǵyn kezekshi bólimge habarlasyp, aıtyp berdim. Keıin jedel tergeý toby keldi. Ári qaraı kezekshiniń nusqaýymen aralaýǵa shyqtyq. Rysqulov aýylyn qaraı júrgen kezde Golf avtokóligin kórdik. Іshinde eshkim bolmady. Biz kezekshige habarlasyp, kólikti tapqanymyzdy aıttyq. Sol kezde bir jigitti baıqadyq. Áriptesimiz ekeýmiz ony ustadyq. Ol «ıá, Mendeleev kóshesinde boldym, tóbeleske qatysym bar» dedi. Ol Darhan Áskentaı bolyp shyqty. Ekinshi ekıpajdy shaqyrdyq, olar (kúdiktini) Talǵar aýdany polıtsııa basqarmasyna aparyp tastady, – dedi ol.

Prokýror kýágerden kúdikti D.Áskentaı ustalǵan kezde qandaı kúıde bolǵanyn surady.

- Kózi isip ketken. Alkogoldik ishimdiktiń ıisi sezildi, – dedi Jánibek Ámiraqyn.

Sondaı-aq ol qyzmet barysynda polıtsııa beınejetony nelikten istemegenin túsindirdi.

- Beınejeton bar. Sol kezde Talǵar aýdany polıtsııa basqarmasy ishinde qurylys júrgizilýine baılanysty barlyq apparat shyǵarylyp tastalǵan bolatyn. Sol úshin istemedi, – dedi ol.

Sotta kelesi bolyp Talǵar aýdany polıtsııa basqarmasy rota patrýldik polıtsııa ınspektory Dáýren Quramysov jaýap berdi.

Foto: Vıdeodan alynǵan skrın

- Shamamen 00:42-de kezekshi bóliminen qońyraý shaldy. Mendeleev kóshesinde tóbeles týraly habarlandy. Biz sol kezde Qonaev kóshesinde narkologııada bolǵanbyz. 7-8 mınýt aralyǵynda «Qamajaı» dúkeni aldyna keldik. Onda bir top adam boldy. Ári qaraı bilgenimizdi kezekshi bólimge baıandap, jedel tergeý tobyn kúttik. Oqıǵa ornynda 4-5 jas bala boldy. Men olardan ne bolǵanyn suradym. Basynan qan aǵyp turǵan bala bireý urǵanyn aıtty. Basqa úlken kisiler kelip, «pyshaqtaldy», «myltyq atyldy» dep aıtty jáne Volkswagen kóligi men Mercedes kóligi ketip qalǵanyn aıtty. Biz kelgennen keıin 2-3 mınýtta jedel járdem, odan keıin jedel tergeý toby keldi. Sosyn kezekshilik bóliminen Volkswagen jáne Mercedes kólikterin ustaý týraly bizge baǵyttama boldy. Volkswagen kóligin Rysqulov aýylynda kórdik. Ony kezekshi bólimge baıandap, kúzetip otyrdyq. Sol kezde er azamatty baıqadyq. Ol ózin Darhan Áskentaı dep tanystyrdy. Іshimdiktiń ıisin sezdim jáne bir kózi kógergen boldy, – dedi ol.

Sonymen qatar prokýror suraǵyna jaýap bergen kýáger «Qamajaı» dúkeni ishinde Sherzattyń ájesin kórgenin esine aldy.

- Dúken ishine kirgen kezde apa otyrdy. Ol kisi «balam aman ba» dep surady. Men «balańyz aman, ýaıymdamańyz» dep shyǵyp kettim. Men basy jarylǵan bala dep oılap qaldym, – dedi Dáýren Quramysov.

Keshe sot otyrysynda kýáger Elmıra Nurbekova jaýap berdi.

Odan keıin ekinshi kýáger qyz Dana Jaqsygeldi oqıǵa týraly baıandady.

Buǵan deıin sotta Sherzattyń ákesi Qarjaýbaı Nurymov ol kıkiljiń qalaı bastalǵanyn aıtqan edi.

Sherzattyń anasy Gúlbara Beıshembıeva da qaıǵyly oqıǵa qalaı bolǵanyn eske aldy.

Eske salaıyq, prokýror oqıǵanyń tolyq hronologııasyn baıandady.

Aıyptalýshylardyń kópshiligi kináni moıyndaǵan joq.

Byltyr 4 qazan kúni tóbelesten 16 jastaǵy jasópirim qaıtys bolǵanyn jazǵan edik.

2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.

2024 jyldyń jeltoqsan aıynda Talǵar mańynda Sherzat Polattyń aǵasy óli tabyldy.

Bıyl aqpan aıynda Sherzat isine qatysty qylmysty tergeý aıaqtaldy. Qylmystyq is 62 tomnan turady. Tergeý barysynda 40 sot saraptamasy júrgizilip, shamamen 200 kýágerden jaýap alynǵan.