Sherzat isi: Sotta beıneaıǵaqtar men kýágerlerdiń jaýaptary talqylandy

TALDYQORǴAN. KAZINFORM — Jetisý oblysynyń qylmystyq ister jónindegi mamandandyrylǵan aýdanaralyq sotynda 16 jastaǵy Sherzat Polattyń ólimine qatysty qylmystyq is boıynsha ashyq sot otyrysy jalǵasyp jatyr.

Búgingi otyrysta jábirlenýshi taraptyń ókili Sherzat Polattyń ata-anasy densaýlyǵyna baılanysty sotqa qatysa almaıtyndaryn málimdedi.

Sot protsesi barysynda qylmystyq is materıaldaryna aıǵaq retinde tirkelgen beınejazbalardy taldaý jalǵasty. Osyǵan baılanysty jábirlenýshi taraptyń qorǵaýshysy Meıirman Shekeev oqıǵa kezinde bolǵan eki qyzdy sotqa shaqyrý jóninde ótinish berdi. Alaıda sot bul ótinishhatty qanaǵattandyrmady.

Jábirlenýshi taraptyń kezekti qorǵaýshysy kýáger Arlan Qazykenovtiń tergeý barysynda bergen jaýabyn oqyp shyqty.

Advokattyń aıtýynsha, Arlan tergeý kezinde avtokóliktiń ishindegi daýystardy tanyǵanyn jáne Nurqııastyń tóbeles týraly aıtyp jatqanyn estigenin málimdegen.

— Nurqııas tóbeles týraly aıtyp jatty, biraq men oǵan mán berip tyńdamadym. Olar artqy oryndyqta ózara sóılesip otyrdy. Avtokólik toqtaǵan kezde bir qyz tóbeles týraly aıtyp berdi. Sol kezde ǵana oqıǵanyń mán-jaıyn túsindim, — degen Arlan.

Sondaı-aq ol «Ólip qaldy ma?» degen sózderge baılanysty tergeýshiniń suraǵyna jaýap berip, bul sózdi Ravıl aıtqanyn, alaıda kimniń ólgenin túsinbegenin aıtqan. Arlannyń sózine qaraǵanda, Ravıl ózin agressıvti ustaǵan, sondyqtan ony sabasyna túsirý úshin «norma dedi ǵoı» dep aıtqan.

Sot otyrysy barysynda tergeý kamerasyndaǵy aıyptalýshy Ravıl Sakıev pen «A» dep belgilengen azamattyń arasyndaǵy dıalog mátini de oqyldy. Sakıev óz sózinde oqıǵa ornyna keıinirek kelgenin jáne ózi pyshaq ne myltyq qoldanbaǵanyn aıtty. Sondaı-aq beınejazbalarda tóbelestiń sońǵy sátteri túsirilgeni, onda pyshaq jaraqaty men atys kórinis tapqany atap ótildi.

Sondaı-aq sottalýshy Ravıl oqıǵa barysynda myltyq atylǵan kezde bireý pyshaq salyp alǵany jaıly aıtqan.

Ravıl Sakıev: — Vıdısh, bratan, anaý, anaý atqan, anaý pyshaq alyp shyqqan, ı ana bala pyshaq alyp tyǵyp jibergen ǵoı tóbelesip jatqanda she. Anaý ar jaǵynan atadyǵoı myltyqpen.

«A»: — Kim?

Ravıl Sakıev: — Sonyń bratany ǵoı poterpevshııdiń, qaıtys bolǵan balanyń, bir márte atady, sol kezde ana bala tyǵyp jiberediǵoı pyshaqty.

«A»: ne znaıý, ne znaıý koroche vıdeony kórgenbiz biz.

Sot protsesinde jábirlenýshi tarap sotqa taǵy bir beınejazbany óńdep ákelgenderin aıtyp, sony baıaýlatyp kórsetý týraly usynys jasady. Alaıda sot bul beınejazbany qaraýdyń qajeti joq dep taýyp, istiń materıaldaryna tirkelmeýine sheshim qabyldady.

Sýdıanyń aıtýynsha, is qujattarynda jazbanyń túpnusqasy tirkelgen jáne qajet bolǵan jaǵdaıda beınejazbany sot ózi qaraıtynyn jetkizdi.

Óz kezeginde sottalýshy Shyńǵys Belqojaev beınejazbany qaıta kórýdiń qajeti joq ekenin aıtyp, óziniń áreketin moıyndady.

— Men naqty baryp Nurqanatty urdym dep aıta almaımyn, múmkin baıqamaı baryp tıip ketken shyǵarmyn, — dedi sottalýshy.

Sonymen qatar sot barysynda jábirlenýshi tarap tergeý kezinde jedel ýákil júrgizgen jasyryn tergeý áreketin zańsyz dep taýyp, is qujattarynan alyp tastaý týraly ótinish jasady. Al, sottalýshy tarap beınejazbanyń aıǵaq retinde qalýyn talap etti. Osy ótinishter boıynsha sot sheshimdi keńesý bólmesinde qabyldaıtynyn habarlady. 

Aıta keteıik, buǵan deıin aıǵaq retinde tárkilengen beınejazba jarııalanǵanyn jazǵanbyz.

Sonymen qatar sýdıaǵa jarııalanǵan qarsylyq qabyldanbady.

Prokýror oqıǵanyń tolyq hronologııasyn baıandady.