Sherzat isi: sot protsesi kezinde tártip buzǵan qyzmetkerlerge shara qoldanyldy
TALDYQORǴAN. KAZINFORM — Sherzat Polattyń ólimine qatysty qylmystyq is boıynsha ótip jatqan sot otyrysynda 2025 jylǵy 29 sáýirde tikeleı efırde taraǵan kúdiktilerdiń beınejazbasyna qatysty qyzmettik tekseristiń qorytyndysy jarııalandy.
Sýdıanyń aıtýynsha, qyzmettik tekseris barysynda sot protsesin onlaın translıatsııalaý kezinde tehnıkalyq qyzmetkerler tarapynan efırdi ýaqytyly toqtatpaý deregi anyqtalǵan. Sonyń saldarynan kúdiktilerdiń beınesi kópshilikke jarııa bolǵan.
Atalǵan jaǵdaı boıynsha tehnıkalyq qyzmetkerler — Rústem Mýksınov, Nazıra Orazálıeva jáne Sáýle Qaıdaǵulova tártiptik jazaǵa tartyldy.
Sonymen qatar keshegi sot otyrysynda aýdıo jazbaǵa baılanysty sýdıa Erjan Januzaqov qaýly jasap, Almaty oblysy prokýrorynyń nazaryna usyndy.
Eske sala keteıik, sýdıa blogerler men áleýmettik jeli qoldanýshylaryna eskertý jasaǵan bolatyn.
Buǵan deıin memlekettk aıyptaýshy sottalýshylardyń árqaısysyna Qylmystyq kodekstiń qaı baptary boıynsha aıyp taǵylǵanyn aıtqan edi.
— Abzal Shynasyl Qylmystyq kodekstiń 293-baby 3-bóligi (buzaqylyq), 99-bap 2-bóligi 1,4,7, 9,14-tarmaqtary (adam óltirý), 24-bap 3-bóligi (qylmysqa daıyndalý jáne qylmysqa oqtalý);
— Ravıl Sákıev Qylmystyq kodekstiń 293-baby 3-bóligi (buzaqylyq), 24-bap 3-bóligi (qylmysqa daıyndalý jáne qylmysqa oqtalý), 99-bap 2-bóligi 7,9-tarmaqtary (adam óltirý);
— Shyńǵys Belǵojaev, Nurqııas Іlııasov, Darhan Áskentaı, Nurbol Toqtaýbaev, Dıdar Qalıahmet, Azamat Toqtaýbaev Qylmystyq kodekstiń 293-baby 3-bóligi (buzaqylyq).
— Kámeletke tolmaǵan Dıdar Ysqaq Qylmystyq kodekstiń 434-baby (qylmys týraly habarlamaý) boıynsha aıyp taǵylyp otyr.