Sherzat isi: kýáger Elmıra Nurbekovadan jaýap alynyp jatyr
TALDYQORǴAN. KAZINFORM — Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda Sherzat Polattyń ólimine baılanysty kezekti sot otyrysy ótip jatyr. Qazir kýáger Elmıra Nurbekova jaýap berip jatyr.
Buǵan deıingi sot otyrysyna eki áıeldiń biri Elmıra Nurbekova kýáger retinde qatysqan edi.
Eske salaıyq, Elmıra Nurbekova Sherzat qaza tapqan túni sottalýshylarmen birge kólikpen «Qamajaı» dúkeniniń aldyna kelgen.
Ol orys tilinde jaýap beretinin aıtyp, aýdarmashynyń kómegine júgindi.
Búgin jábirlenýshiniń ókili kýágerden Talǵardaǵy qaı mektepte oqyǵanyn surady. Advokat sot nazaryn Elmıra Nurbekovanyń buǵan deıin tek qazaq tilinde jaýap bergenine aýdardy.
Іsti qarap jatqan sýdıa Erjan Januzaqov kýágerge orys tilinde jaýap berýge ruqsat berilgenin eske saldy.
— Men sotqa deıingi tergeý barysynda orys tilinde jaýap berdim. Sondaı-aq bizden eki kún boıy 100-ge jýyq adam jaýap aldy. Men tezirek qolymdy qoıyp ketýge asyqtym, — dedi Elmıra Nurbekova.
Qazir sotta kýáger Elmıra Nurbekovanyń sotqa deıingi tergeý barysynda bergen jaýaby túsirilgen vıdeo kórsetilip jatyr. Onda ol qazaq tilinde jaýap berip otyr.
Aıta keteıik, kýáger ótken sot otyrysynda, búgin de orys tilinde jaýap berip jatyr.
Buǵan deıin sotta Sherzattyń ákesi Qarjaýbaı Nurymov ol kıkiljiń qalaı bastalǵanyn aıtqan edi.
Sondaı-aq Qarjaýbaı Nurymov Sherzattyń qashan jan tapsyrǵanyn aıtty.
Sherzattyń anasy Gúlbara Beıshembıeva da qaıǵyly oqıǵa qalaı bolǵanyn eske aldy.
Eske salaıyq, prokýror oqıǵanyń tolyq hronologııasyn baıandady.
Aıyptalýshylardyń kópshiligi kináni moıyndaǵan joq.
Byltyr 4 qazan kúni tóbelesten 16 jastaǵy jasópirim qaıtys bolǵanyn jazǵan edik.
2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.
2024 jyldyń jeltoqsan aıynda Talǵar mańynda Sherzat Polattyń aǵasy óli tabyldy.
Bıyl aqpan aıynda Sherzat isine qatysty qylmysty tergeý aıaqtaldy. Qylmystyq is 62 tomnan turady. Tergeý barysynda 40 sot saraptamasy júrgizilip, shamamen 200 kýágerden jaýap alynǵan.