Sherzat isi: Sýdıaǵa jarııalanǵan qarsylyq qabyldanbady

TALDYQORǴAN. KAZINFORM — Sherzat Polattyń ólimine qatysty qylmystyq is boıynsha sot otyrysy jalǵasyp jatyr.

Sot otyrysy úzilisten keıin Qylmystyq-protsestik kodekstiń 87-baby 11-bóligine sáıkes sýdıaǵa qarsy jarııalanǵan qarsylyqty sýdıa Asqar Beıimbetov qarady.

Sot barysynda qorǵaýshy Jumat Ábenov tergeýshi men sarapshylardy sot otyrysyna shaqyrý jóninde ótinish bildirip, sottalýshy Abzal Shynasylǵa qatysty keıbir aıǵaq bir-birine sáıkes kelmeıtinin alǵa tartqan. 

— Іs materıaldarynda onyń ústindegi kıim qara tústi dep kórsetilgen, alaıda ol kezde Abzaldyń ústinde qara-kók tústi kıim bolǵan. Sondyqtan men tergeýshi men sarapshylardy sotqa shaqyrýǵa negiz bar dep esepteımin, — dedi advokat.

Sýdıa sot otyrysyna qatysýshylardyń pikirlerin tyńdaǵan soń, qorǵaýshy Jumat Ábenovtiń iske tóraǵalyq etýshi sýdıa Erjan Januzaqovqa jarııalaǵan qarsylyǵyn negizsiz dep taýyp, ótinishti qanaǵattandyrýsyz qaldyrdy.

Eske salaıyq, Prokýror sottalýshylardyń árqaısysyna QR Qylmystyq kodekstiń qaı baptary boıynsha aıyp taǵylǵanyn atap ótti. 

— Abzal Shynasyl Qylmystyq kodekstiń 293-baby 3-bóligi (buzaqylyq), 99-bap 2-bóligi 1,4,7, 9,14-tarmaqtary (adam óltirý), 24-bap 3-bóligi (qylmysqa daıyndalý jáne qylmysqa oqtalý);
— Ravıl Sákıev Qylmystyq kodekstiń 293-baby 3-bóligi (buzaqylyq), 24-bap 3-bóligi (qylmysqa daıyndalý jáne qylmysqa oqtalý), 99-bap 2-bóligi 7,9-tarmaqtary (adam óltirý);
— Shyńǵys Belǵojaev, Nurqııas Іlııasov, Darhan Áskentaı, Nurbol Toqtaýbaev, Dıdar Qalıahmet, Azamat Toqtaýbaev Qylmystyq kodekstiń 293-baby 3-bóligi (buzaqylyq).
— Kámeletke tolmaǵan Dıdar Ysqaq Qylmystyq kodekstiń 434-baby (qylmys týraly habarlamaý) boıynsha aıyp taǵylyp otyr.

Aıta keteıik, oqıǵa boıynsha memlekettik saraptama qortyndysy jarııalanǵanyn jazǵanbyz.

Sondaı-aq, Sherzat sotynda aıyptalýshylar men jábirlenýshilerdi bettestirý sáti kórsetilgen bolatyn.