Sherzat isi boıynsha sotta úshinshi aıyptalýshy jaýap berdi

TALDYQORǴAN. KAZINFORM – Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda Sherzat Polattyń ólimine baılanysty sot otyrysy ótip jatyr.

Búgin sotta aıyptalýshy Nurbol Toqtaýbaevtan jaýap alyndy.

Odan keıin Nurbol Toqtaýbaevtyń inisi, aıyptalýshy Azamat Toqtaýbaev jaýap berip, bolǵan oqıǵa týraly baıandady.

- Tanystarym «Eıforııa» kafesinde otyrǵanyn aıtty, sóıtip amandasyp keteıin degen nıetpen bardym. Arada 20 mınýt ótkennen keıin aǵam Toqtaýbaev Nurbol ketip qaldy. Kafe jabylaıyn dep jatqanda, bárimiz tarqaıyq dep jatqanbyz. Sol kezde tanysym Belǵojaev Shyńǵys habar berdi. Darhandy emes, Nurboldy bireý uryp ketti dep túsindim. Jolda Darhandy urǵanyn estidim. Biraq adamdar tobyn quryp, paıdalanyp, pyshaq alý oıymyzda bolǵan joq. Rýlde Shyńǵys, sosyn Nurqııas, Ravıl, men jáne eki qyz kólikte boldyq. Abzaldy úıine ketip qaldy dep oıladym, – dedi ol.

Aıyptalýshy Azamat Toqtaýbaev dúken aldyndaǵy jaǵdaıdy jáne janjal qalaı bastalǵanyn da túsindirdi.

- «Qamajaı» dúkenine keldik. Buryn onda kirip kórmegenmin. Aldynda bir top bala tur eken. Darhan Áskentaı, aǵam Nurboldy qosqanda 8 shaqty adam turdy. Men birinshi bolyp topqa amandastym. Darhannyń beti qanap tur eken, «Nurbol ekeýiń emhanaǵa bardyńdar» dep aıtqan bolatynmyn. Sóıtip dúkenniń ishine qarasam, 3 jyl buryn kórgen Qalıahmet Dıdardy kórdim. Toptyń arasynan ótip, amandasaıyn degen nıetpen dúkenge kirdim. Amandasyp turǵan kezde dalada janjal bastalyp ketkenin sezdik. Dalaǵa shyqqanda tóbeles bastalyp ketti. Artyma qarasam Qarjaýbaı myrza pyshaqpen tur eken. Maǵan jas kórindi: «brat, qolyńyzdaǵy pyshaqty tastańyz, men ózim tizimde júrgen adammyn, tóbeles kerek emes» dep aıtyp jatqan kezde myltyqtyń daýsy estildi. Sóıtip men shoshyp kettim da, Shyńǵystyń kóliginiń artyna tyǵylyp qaldym. Aǵamdy atyp tastamasyn dep qolynan tarttym. Sol kezde Ǵaıypbaev ekinshi oqty salyp jatqanyn kórdim. Negizi birinshisin «Mıasnaıa lavkaǵa» atty, men ony sezdim. Ekinshisin «óltirem» dep aspanǵa atty. Sol kezde balalar ári qaraı júgirip ketti. Sosyn toptyq tóbeleske bara jatqan kezde aıaǵymnyń astyna telefon ilindi. Qyzdardyń ne bizben kelgen jigitterdiń telefony túsip qaldy ma degen nıetpen aldym. 4-5 metr júrgende aldymnan Nurqııas Іlııasov shyqty, qolynda qarýy bar. Maǵan ustatty da, «kettik» dedi. Men Mersedes kóligine ózimmen alyp kettim, – dedi aıyptalýshy.

Sonymen qatar Azamat Toqtaýbaev Talǵar turǵyny túsirgen janjaldyń beınejazbasynda óziniń joq ekenin aıtty.

- Aıfonnan túsirilgen vıdeoda joqpyn. Qarjaýbaı myrzaǵa da qolymnyń ushy tıgen joq, inisine de, balasyna da qolym tıgen joq, – dedi ol.

Buǵan deıin sotta 4 qazan kúni bolǵan janjal beınejazbasy jarııalandy.

Ótken sot otyrysynda aıyptalýshy Darhan Áskentaıdan jaýap alyndy.

Sonymen qatar sotta dúken kamerasyna túsken oqıǵanyń tolyq beınejazbasy kórsetildi.

Alǵashqy sot otyrysynda prokýror oqıǵanyń tolyq hronologııasyn baıandady.

Byltyr 4 qazan kúni tóbelesten 16 jastaǵy jasópirim qaıtys bolǵanyn jazǵan edik.

2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.

2024 jyldyń jeltoqsan aıynda Talǵar mańynda Sherzat aǵasynyń denesi tabyldy.