Sherzat isi boıynsha sot otyrysy 28 sáýir kúni jalǵasady
TALDYQORǴAN. KAZINFORM - Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda Sherzat Polattyń ólimine baılanysty kezekti sot otyrysy ótti.
Búgingi otyrysta jábirlenýshiler men kýágerlerden jaýap alyndy. Sýdıa Erjan Januzaqov kelesi sot otyrysyn 28 sáýir saǵat 10:00-ge taǵaıyndady. Odan keıin 29 sáýir, 5-6 mamyr saǵat 10:00-de ótedi. Sot otyrysynyń kúnderi mamyr aıyndaǵy demalys kúnderine baılanysty ózgerdi.
Buǵan deıin Qarjaýbaı Nurymov kıkiljiń qalaı bastalǵanyn, sondaı-aq Sherzattyń qashan jan tapsyrǵanyn aıtty.
Sherzattyń anasy Gúlbara Beıshembıeva da qaıǵyly oqıǵa qalaı bolǵanyn eske aldy.
Eske salaıyq, prokýror oqıǵanyń tolyq hronologııasyn baıandady.
Aıyptalýshylardyń kópshiligi kináni moıyndaǵan joq.
Byltyr 4 qazan kúni tóbelesten 16 jastaǵy jasópirim qaza bolǵanyn jazǵan edik.
2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.
2024 jyldyń jeltoqsan aıynda Talǵar mańynda Sherzat Polattyń aǵasynyń denesi tabyldy.
Bıyl aqpan aıynda Sherzat isine qatysty qylmysty tergeý aıaqtaldy. Qylmystyq is 62 tomnan turady. Tergeý barysynda 40 sot saraptamasy júrgizilip, shamamen 200 kýágerden jaýap alynǵan.