Sherzat isi boıynsha kelesi sot otyrysy bastaldy
TALDYQORǴAN. KAZINFORM — Keshe basty sot talqylaýynyń alǵashqy otyrysy ótti.
Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda Sherzat Polattyń ólimine baılanysty sot otyrysynyń kelesi talqylaýy bastaldy. Keshe sot qatysýshylarynyń ótinishine qaramastan, sýdıa sottyń Taldyqorǵan qalasyndaǵy osy ǵımaratta ótetinin aıtty.
Sot otyrysyn Joǵary sottyń Youtube arnasynan tikeleı efırde kórýge bolady.
Eske salaıyq, buǵan deıin sotta Sherzat óliminiń negizgi sebebi ataldy.
Sondaı-aq Nurqanat Ǵaıypbaevtyń janjal barysynda qandaı jaraqat alǵany aıtyldy.
Prokýror oqıǵanyń tolyq hronologııasyn baıandady.
Aıyptalýshylardyń kópshiligi kináni moıyndaǵan joq.
Byltyr 4 qazan kúni tóbelesten 16 jastaǵy jasópirim qaıtys bolǵanyn jazǵan edik.
2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.
2024 jyldyń jeltoqsan aıynda Talǵar mańynda Sherzat Polattyń aǵasynyń denesi tabyldy.
Bıyl aqpan aıynda Sherzat isine qatysty qylmysty tergeý aıaqtaldy. Qylmystyq is 62 tomnan turady. Tergeý barysynda 40 sot saraptamasy júrgizilip, shamamen 200 kýágerden jaýap alynǵan.