Sherzat isi boıynsha qamaýdaǵy kúdiktiler týǵan kún toılaǵan: jaýaptylar jazalanady

QONAEV. KAZINFORM — Almaty oblysynyń polıtsııasy ýaqytsha ustaý ızolıatorynda týǵan kún toılap jatqan vıdeoǵa qatysty qyzmettik tekseris júrgizip jatyr.

Áleýmettik jelide 16 jastaǵy jasóspirim Sherzat Polattyń ólimine qatysty is boıynsha ustalǵandar ýaqytsha ustaý ızolıatorynda týǵan kún toılap jatqany týraly vıdeo paıda boldy.

— Ýaqytsha ustaý ızolıatorynan taraǵan vıdeo boıynsha jan-jaqty tekserý júrgizilip jatyr. Barlyq kináli tulǵalar, sonyń ishinde basshylyq ta, qatań jaýapkershilikke tartylady. Tergeý barysy erekshe baqylaýǵa alyndy. Osy quqyq buzýshylyqqa yqpal etken sebepter men jaǵdaılardy joıý boıynsha sharalar qabyldandy, - dep habarlady óńir polıtsııasynan.

Osyǵan deıin Sherzat Polattyń ólimine qatysty is sotqa qashan joldanatyny týraly jazǵan edik.

Eske salaıyq, byltyr 4 qazan kúni tóbelesten 16 jasar jasópirim qaıtys bolǵanyn jazǵanbyz. 

Keıin ashýly talǵarlyqtar jasóspirim ólimine baılanysty narazylyqqa shyqty. 

2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady. 

15 qazan kúni Talǵar qalasynyń ákimi Bahyt Qýatbekuly Kúrishbekov, Talǵar qalasy ákiminiń orynbasary Matan Saǵyndyq óz mindetterin tıisti deńgeıde atqarmaǵany úshin laýazymdarynan bosatyldy. Artynsha, Talǵar aýdany ákimi apparatynyń basshysy Aslan Qasymbaev qyzmetinen qýyldy. 

Byltyr jeltoqsan aıynda Talǵar mańynda Sherzat Polattyń aǵasy óli tabyldy. 

Keıin Azat aýylynda jerleý rásimin ótkizý kezinde qoǵamdyq tártipti buzǵany úshin Sherzat Polattyń ákesi Qarjaýbaı ustalǵanyn jazǵanbyz.