Sherzat isi boıynsha apellıatsııalyq sot qashan ótetini belgili boldy
QONAEV. KAZINFORM — Sherzat Polattyń ólimine qatysty aıyptalǵan 8 sottalýshyǵa qatysty apellıatsııalyq sot Almaty oblysynda ótedi.
Kazinform saýalyna jaýap bergen Almaty oblysy sotynyń málimetinshe, qylmystyq is 2025 jyldyń 18 tamyz kúni saǵat 11:00–de oblystyq sot ǵımaratynda qaıta qaralady. Atalǵan is boıynsha:
A.Shynasyl — Qazaqstan Respýblıkasy Qylmystyq kodeksiniń 293-babynyń 3-bóligi, 99-babynyń 2-bóliginiń 5, 9, 14 tarmaqshalary, 24-babynyń 3-bóligi jáne 99-babynyń 2-bóliginiń 1, 7, 9 tarmaqshalary boıynsha;
R.Sákıev — 293-baptyń 3-bóligi, 24-baptyń 3-bóligi jáne 99-baptyń 2-bóliginiń 7, 9 tarmaqshalary boıynsha;
A.Toqtaýbaev — 293-baptyń 3-bóligi jáne 188-baptyń 1-bóligi boıynsha;
Sh. Belǵojaev, D.Áskentaı, N.Іlıasov, N.Toqtaýbaeva jáne D.Qalıahmet — 293-baptyń 3-bóligi boıynsha;
D. Ysqaq — 434-bap boıynsha sottalǵan.
Sondaı-aq Almaty oblysynyń soty D. Ysqaqqa taǵaıyndalǵan jaza merziminiń tolyq ótelýine baılanysty bosatylǵanyn rastady.
Buǵan deıin jábirlenýshi taraptyń advokaty bolǵan Meıirman Shekeev aıyptalýshylardyń biri jazasyn óteýine baılanysty bostandyqqa shyqqanyn habarlaǵan edi.
Eske salaıyq, byltyr 4 qazan kúni tóbelesten 16 jastaǵy Sherzat Polat qaza boldy.
Bul is boıynsha barlyǵy 9 adam 23 jyldan 1,5 jylǵa deıin sottaldy.