Sherzat isi: aıǵaq retinde tárkilengen beınejazba jarııalandy
TALDYQORǴAN.KAZINFORM – Sherzat Polattyń ólimine qatysty qylmystyq is boıynsha sot otyrysy jalǵasyp jatyr. Búgingi otyrysta is materıaldaryn zerdeleý kezeńi aıaqtalyp, qosymsha derekter jarııa etildi.
Sot barysynda advokat Meıirman Shekeev tergeý kezinde aıǵaq retinde tárkilengen Land Cruiser markaly kóliktiń beınejazbasyn kórsetti.
Atalǵan jazbada sottalýshylardyń oqıǵa bolǵannan keıin kólik ishinde bolǵan áńgimesi jazylǵan. Kólik ishinde bolǵan kýáger qyzdyń da daýysy anyq estiledi. Jazbada olardyń jolda bolǵan oqıǵany talqylap, aldaǵy áreketteri jóninde jospar qurǵany estiledi.
Kórsetilgen beınejazba negizinde sottalýshylarǵa birqatar suraq qoıyldy.
Sonyń ishinde jábirlenýshi taraptyń advokaty sottalýshy Nurqııasqa qandy oqıǵa kezinde áıeldi kórgeni jaıly aqparatty oqyp berdi. Sottalýshy bul málimetti rastady, ol bir áıeldiń aldynan shyqqanyn aıtty.
Alaıda osy sátte advokat Meıirman Shekeev aldyńǵy sot otyrysynda sottalýshylar áıeldi kórmedik dep jaýap bergenin eske saldy. Osy jaǵdaı sotta aıtylǵan burynǵy jaýaptar men qazirgi málimdemeler arasynda alshaqtyq baryn kórsetti.
Eske salaıyq, prokýror sottalýshylardyń árqaısysyna Qylmystyq kodekstiń qaı baptary boıynsha aıyp taǵylǵanyn atap ótti.
— Abzal Shynasyl Qylmystyq kodekstiń 293-baby 3-bóligi (buzaqylyq), 99-bap 2-bóligi 1,4,7, 9,14-tarmaqtary (adam óltirý), 24-bap 3-bóligi (qylmysqa daıyndalý jáne qylmysqa oqtalý);
— Ravıl Sákıev Qylmystyq kodekstiń 293-baby 3-bóligi (buzaqylyq), 24-bap 3-bóligi (qylmysqa daıyndalý jáne qylmysqa oqtalý), 99-bap 2-bóligi 7,9-tarmaqtary (adam óltirý);
— Shyńǵys Belǵojaev, Nurqııas Іlııasov, Darhan Áskentaı, Nurbol Toqtaýbaev, Dıdar Qalıahmet, Azamat Toqtaýbaev Qylmystyq kodekstiń 293-baby 3-bóligi (buzaqylyq).
— Kámeletke tolmaǵan Dıdar Ysqaq Qylmystyq kodekstiń 434-baby (qylmys týraly habarlamaý) boıynsha aıyp taǵylyp otyr.
Aıta keteıik, oqıǵa boıynsha memlekettik saraptama qortyndysy jarııalanǵanyn jazǵanbyz.
Sondaı-aq, Sherzat sotynda aıyptalýshylar men jábirlenýshilerdi bettestirý sáti kórsetilgen bolatyn.