Sherzat isi: Abzal Shynasyl kimdi pyshaqtaǵanyn aıtty
TALDYQORǴAN. KAZINFORM — Jetisý oblysynyń mamandandyrylǵan aýdanaralyq sotynda qaralyp jatqan Sherzat Polattyń ólimine qatysty qylmystyq is boıynsha basty sottalýshy Abzal Shynasyl jaýap berdi.
Sot otyrysynda Abzal taǵylǵan aıypty jartylaı moıyndaıtynyn jetkizdi.
— Dosym Nurqııastan «Eıforııa» meıramhanasynda ekenin bildim, 15-20 mınýtta men de sol jerge jettim. Keıinirek eki qyz keldi, artynan Azamat pen Shyńǵys, odan soń Dýman men Nurbol qosyldy. Bir kezde Nurbol bireýdiń dosyn uryp ketkenin aıtty, biraq biz oǵan mán bermeı, bı alańyna bettedik. Keıin meıramhana jabylar ýaqytta Azamat pen Shyńǵystyń joq ekenin baıqadym. Azamat maǵan habarlasyp, «Nurbol dosymen birge Mendeleev kóshesindegi dúkenniń janynda bireýlermen tóbelesip qaldy» dedi, — dedi ol.
Abzaldyń aıtýynsha, sol túni jastar stadıonyna jolshybaı bara jatqanda tóbeles bolyp jatqany jaıly aqparat alǵan.
Oqıǵa ornyna jetkende Nurqanat Ǵaıypbaevtyń qolynan myltyq kórgen.
— Nurqanat aspanǵa oq atty, keıin qarýdy bizge qaraı kezedi. Men «atpa, sóıleseıik» dedim, ol bolsa boqtap, «atam» dedi. Ol meni ata jazdady, oq sol qulaǵymnyń janynan ótti. Keıin bir bala qarýdy tartyp almaq boldy, biraq Nurqanat ony shalyp qulatty. Sol kezde men art jaǵynan jaqyndap, ony urýǵa tyrystym. Sol sátte janyndaǵy Sherzat qulap tústi. Neden qulaǵanyn bilmeımin, shalynyp qaldy dep oıladym, — dedi Shynasyl.
Abzaldyń aıtýynsha, osydan keıin ol Nurqanatty pyshaqtaǵan.
Eske sala keteıik, Sherzat Polattyń ólimine qatysty 16 mamyrdaǵy sotta taǵy bir sottalýshy aıyptaý aktisimen kelispeıtinin aıtqan.
Nurqııas Іlııasov myltyqpen urý sebebin túsindirse, Azamat Toqtaýbaev ótirik aıǵaq bergenin rastady.
Kámeletke tolmaǵan aıyptalýshy Dýman Ysqaq ózine taǵylǵan aıypty moıyndamady.
Aıta keteıik, Sherzat Polattyń ólimi boıynsha alǵashqy sot otyrysynda prokýror oqıǵanyń tolyq hronologııasyn baıandady.
Byltyr 4 qazan kúni tóbelesten 16 jastaǵy jasóspirim qaza bolǵanyn jazǵan edik.
2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.
2024 jyldyń jeltoqsan aıynda Talǵar mańynda Sherzattyń aǵasy Nurqanat Ǵaıypbaevtyń denesi tabyldy.