Sherzat isi: Sottalýshy Dýman Ysqaq ózine taǵylǵan aıypty moıyndamady

TALDYQORǴAN. KAZINFORM — Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda Sherzat Polattyń ólimine qatysty sot otyrysy ótip jatyr.

Kezekti sotttalýshy kámelet jasyna tolmaǵan Dýman Ysqaq jaýap berdi. Advokat sottalýshydan oqıǵa qalaı bastalǵanyn aıtyp berýdi surady. 

Dýman Ysqaqtyń aıtýynsha, Nurbol Toqtaýbaev «kishkene ishimdik iship alyp edim, kólik júrgizetin eshkim joq» dep kómektesýin ótingen.

— Úlken kisi bolǵannan keıin kólik aıdaýǵa óz erkimmen kelistim. Keıin Rysqulov aýylynan Talǵar aýylyna ekeýimiz birge keldik. Nurbol «dosym Azamatty aparyp tastaǵan soń seni taksıge otyrǵyzyp jiberemin» dedi. Nurbol jolda Shyńǵys Belǵojaevqa qaı jerde ekenin bilý úshin habarlasyp, sol jerge baratynymyzdy aıtty. Meıramhana aldynda Darhan degen dosyn uryp ketkenin aıtyp, sol jerge baramyz dedi. Oqıǵa bastalǵanda «Nurbol aǵa, bári tynysh eken ǵoı, úıge qaıtaıyqshy» dep ótindim, — dedi sotta Dýman. 

Aıyptalýshynyń aıtýynsha, Qarjaýbaımen eshqandaı kelispeýshilik bolmaǵan, sondyqtan Qarjaýbaıdyń osy sotta oqıǵanyń qalaı bastalǵany jaıly nusqasymen kelisedi. 

Advokattyń suraǵyna jaýap bergen sottalýshy Dýman Ysqaq óz sózinde Qylmystyq kodekstiń 434-babymen (asa aýyr qylmysty habarlamaý) aıyptalyp otyrǵanyn, biraq óz kinásin moıyndamaıtynyn aıtty.

Sonymen qatar sol túni oqıǵanyń qalaı órbigenin jańalyqtardan ǵana kórgenin málimdedi. 

Eske sala keteıik, Sherzat Polattyń ólimi boıynsha alǵashqy sot otyrysynda prokýror oqıǵanyń tolyq hronologııasyn baıandady.

Byltyr 4 qazan kúni tóbelesten 16 jastaǵy jasópirim qaza bolǵanyn jazǵan edik.

2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.

2024 jyldyń jeltoqsan aıynda Talǵar mańynda Sherzat aǵasynyń denesi tabyldy.