Sherzat Polattyń úıiniń órtenýine qatysty jańa derekter málim boldy

ASTANA. KAZINFORM – Bas prokýrordyń orynbasary Ǵalymjan Qoıgeldıev Sherzat Polattyń úıiniń órtenýine qatysty tergeýdiń jańa málimetterin aıtty.

- Bul is boıynsha sotqa deıingi tergeý áli jalǵasyp jatyr. Keń aýqymdy saraptamalar jasaldy. Bul saraptamalardyń belgili bir nátıjeleri bar. Biz Reseı Federatsııasyna halyqaralyq tergeý buıryǵyn jiberdik. Spýtnık arqyly sol mańda qandaı avtokólikter turǵanyn anyqtaǵymyz keledi, - dedi Ǵ.Qoıgeldıev Senatta tilshiler suraǵyna jaýap bere otyryp.

Onyń aıtýynsha, osy isti tyńǵylyqty zertteý úshin taǵy ýaqyt kerek.

Buǵan deıin habarlanǵandaı, Resmı málimetke sáıkes, is boıynsha aldyn ala tyńdaý 10 sáýir saǵat 12:00-de Jetisý oblysy, Taldyqorǵan qalasy, Qablısa jyraý kóshesi, №65 mekenjaıynda ornalasqan Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda ótedi.

Eske salaıyq, byltyr 4 qazan kúni tóbelesten 16 jastaǵy jasóspirim qaıtys bolǵanyn jazǵanbyz. 

2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.