Sherzat Polattyń úıin órteýge qatysty qylmystyq is áli tergelip jatyr
ASTANA. KAZINFORM — Marqum Sherzat Polattyń úıin órteý faktisi boıynsha tergeý amaldary jalǵasyp jatyr. Bul týraly Іshki ister mınıstri Erjan Sadenov málim etti.
— Іs arnaıy prokýrordyń qaraýynda. Qazir tergeý amaldary júrip jatyr, mán-jaıyn aıta almaımyn. Jumys qarqyndy júrip jatyr. Baqylaýda ustap otyrmyz, — dep qysqa qaıyrdy Erjan Sadenov Májiliste BAQ ókilderiniń saýalyna jaýap bere turyp.
Sondaı-aq mınıstr Sherzattyń aǵasy Nurǵanat Ǵaıypbaevtyń óz-ózine qol jumsaýy faktisi boıynsha da is tergelip jatqanyn tilge tıek etti.
Buǵan deıin Іshki ister mınıstri marqum Sherzat Polattyń ákesine qatysty is qozǵalmaǵanyn aıtqan edi.
Bıyl 5 maýsymda Jetisý oblysynyń qylmystyq ister jónindegi mamandandyrylǵan aýdanaralyq sotynda 16 jastaǵy Sherzat Polattyń ólimine qatysty qylmystyq is boıynsha úkim jarııalandy.
Sonymen qatar Sherzat Polattyń isinde kim raqymshylyqqa ilinýi múmkin ekenin jazǵan edik.