Sherzat Polattyń isi: Prokýror kýágerdiń jaýabyna kúmán keltirdi
TALDYQORǴAN. KAZINFORM – Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda Sherzat Polattyń ólimine baılanysty kezekti sot otyrysy ótip jatyr. Prokýror Dana Sársenbaı oqıǵa ornynda bolǵan kýáger Elmıra Nurbekovanyń jaýaptarynda qaıshylyqtar bar ekenin aıtty.
Memlekettik aıyptaýshy, kýáger Elmıra Nurbekovanyń tergeý barysynda bergen jaýaptary men sotta aıtqan sózderi bir-birine sáıkes kelmeıtinin jetkizdi.
– Aldyn ala tergeý barysynda jáne ótken sot otyrysynda siz shok kúıinde bolǵandyqtan qatelesýińiz múmkin ekenin aıttyńyz. Alaıda beınejazbada sizde shok kúıi baıqalmaıdy.
Sondaı-aq 5 qazan kúni bergen jaýabyńyzda balanyń jerde ishpen, qan bolyp jatqanyn jáne Abzaldyń oǵan pyshaqpen soqqy jasaǵanyn aıttyńyz. Al qazir sotta pyshaqty kórmegenińizdi aıtyp otyrsyz, — dep surady prokýror.
Óz kezeginde Elmıra Nurbekova tergeý kezinde jaýapty eki tilde, oryssha jáne qazaqsha aralastyryp bergenin jáne kóp nárse esinde joq ekenin aıtty.
— Shynymdy aıtsam, ne degenimdi bilmeımin. Men onyń qalaı urǵanyn kórdim, biraq pyshaqtyń bar-joǵyn kórmedim. Eger men pyshaq kórgen bolsam, onda bar dep aıtar edim, — deıdi ol.
Prokýrordyń ótinishi boıynsha Nurbekova sot zalynda aıyptalýshynyń soqqyny qalaı jasaǵanyn kórsetti — «joǵarydan tómen» qaraı.
Aıta keteıik, búgin sot otyrysynda Sherzat Polattyń isinde kýáger retinde tanylǵan Elmıra Nurbekovadan jaýap alynyp jatyr.
Eske salaıyq, ol Sherzat qaza tapqan túni sottalýshylarmen birge kólikpen «Qamajaı» dúkeniniń aldyna kelgen eki áıeldiń biri.
Buǵan deıin sotta Sherzattyń ákesi Qarjaýbaı Nurymov ol kıkiljiń qalaı bastalǵanyn aıtqan edi.
Sondaı-aq Qarjaýbaı Nurymov Sherzattyń qashan jan tapsyrǵanyn aıtty.
Sherzattyń anasy Gúlbara Beıshembıeva da qaıǵyly oqıǵa qalaı bolǵanyn eske aldy.
Eske salaıyq, prokýror oqıǵanyń tolyq hronologııasyn baıandady.
Aıyptalýshylardyń kópshiligi kináni moıyndaǵan joq.
Byltyr 4 qazan kúni tóbelesten 16 jastaǵy jasópirim qaıtys bolǵanyn jazǵan edik.
2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.
2024 jyldyń jeltoqsan aıynda Talǵar mańynda Sherzat Polattyń aǵasy óli tabyldy.
Bıyl aqpan aıynda Sherzat isine qatysty qylmysty tergeý aıaqtaldy. Qylmystyq is 62 tomnan turady. Tergeý barysynda 40 sot saraptamasy júrgizilip, shamamen 200 kýágerden jaýap alynǵan.