Sherzat Polattyń isi boıynsha tergeý aıaqtaldy

QONAEV. KAZINFORM — 16 jastaǵy jasóspirimniń ólimine qatysty qylmystyq isti tergeý aıaqtaldy.

Bul týraly zardap shekken otbasynyń advokattary áleýmettik jelide habarlaǵan bolatyn. Almaty oblysynyń Polıtsııa departamenti aıtylǵan derekti rastady.

— Ótken jyly 4 qazanǵa qaraǵan túni bolǵan kámeletke tolmaǵan adamdy óltirý faktisi boıynsha qylmystyq isti tergeý aıaqtaldy. Qazirgi ýaqytta taraptardy sotqa deıingi tergeý materıaldarymen tanystyrý protsesi júrip jatyr. Taraptar tanysqannan keıin qylmystyq is onyń zańdylyǵyn tekserý jáne sotqa jiberý týraly máseleni sheshý úshin prokýrorǵa jiberiledi, — dep habarlady oblystyq PD baspasóz qyzmeti.

Eske salaıyq, buǵan deıin 4 qazanda Talǵar qalasyndaǵy tóbelesten bir jasóspirim qaıtys bolǵanyn jazǵanbyz. 

Ashýly talǵarlyqtar jasóspirim ólimine baılanysty narazylyqqa shyqty. 

Almaty oblysynyń Prokýratýrasy kisi óltirý týraly bul is erekshe baqylaýǵa alynǵanyn resmı túrde habarlady. 

12 qazan kúni túnde qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.

Prokýratýra sottyń ashyq ótýin suraıtyndaryn jetkizdi.