Sherzat Polattyń isi: basty kúdikti sotqa tolyq daıyn emes ekenin málimdedi

TALDYQORǴAN. KAZINFORM – Sherzat Polatqa qatysty is Jetisý oblysynyń qylmystyq ister jónindegi mamandandyrylǵan aýdanaralyq sotynda ótip jatyr.

Búgingi sotta aıyptalýshylar óziderin tanystyrdy. Basty kúdiktilerdiń biri retinde tanylǵan Abzal Shynasyl aıyptaý aktisiniń kóshirmesin qolyna alǵanyn jetkizdi.

– Men aıyptaý aktisin aldym. Alaıda sotqa jartylaı daıynmyn, tolyq daıyn emespin, – dedi ol.

Munyń sebebi nede dep sýdıa suraǵanda onyń qorǵaýshysy sot kezinde ǵana iske aralasqanyn aıtty.

– Іsti tolyq zerttep bitpedik. Tolyq pozıtsııalarymyzdy aıqyndaı almaı jatyrmyz. Tolyq daıyn emespiz. Bir jaǵynan Shynasyl taǵylǵan aıypty moıyndamaımyn dep otyr, – dedi advokat.

Sondaı-aq kisi óltirýge oqtalý jáne buzaqylyq boıynsha aıyptalyp otyrǵan Ravıl Saqıev ta sot otyrysyna daıyn emestigin jetkizdi.

Sherzat isi boıynsha naqty 9 kúdikti bar, onyń ishinde bir jasóspirim aýyr qylmys týraly habarlamaǵany úshin aıyptalyp jatyr.

Abzal Shynasyl — adam óltirý jáne buzaqylyq jasaǵany úshin aıyptalyp otyr. Ravıl Saqıev — kisi óltirýge oqtalý jáne buzaqylyq boıynsha aıyptaldy. Shyńǵys Belǵojaev, Darhan Áskentaı, Nurqııas Ilıasov, Nurbol Toqtaýbaev men Azamat Toqtaýbaev, Dıdar Qalıahmet — buzaqylyq boıynsha aıyptalyp jatyr. Al kámeletke tolmaǵan Dýman Ysqaq — aýyr qylmys týraly habarlamaǵany úshin aıyptalyp otyr. 

Aıta keteıik, 10 sáýir kúni Taldyqorǵanda Sherzat Polattyń ólimi týraly is boıynsha aldyn ala tyńdaý ótken bolatyn. 

Onyń barysynda, 16 jastaǵy Sherzat Polatty aıýandyqpen óltirdi dep aıyptalǵandar alqabıler sotynan bas tartty. 

Sondaı-aq Prokýror sotalýshylardyń árqaısysyna QR Qylmystyq kodeksiniń qaı baptary boıynsha aıyp taǵylǵanyn oqydy.

Byltyr 4 qazan kúni tóbelesten 16 jastaǵy jasópirim qaıtys bolǵanyn jazǵanbyz. 

Keıin ashýly talǵarlyqtar jasóspirim ólimine baılanysty narazylyqqa shyqty. 

2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady. 

15 qazan kúni Talǵar qalasynyń ákimi Bahyt Qýatbekuly Kúrishbekov, Talǵar qalasy ákiminiń orynbasary Matan Saǵyndyq óz mindetterin tıisti deńgeıde atqarmaǵany úshin laýazymdarynan bosatyldy. Artynsha, Talǵar aýdany ákimi apparatynyń basshysy Aslan Qasymbaev qyzmetinen qýyldy. 

2024 jyldyń jeltoqsan aıynda Talǵar mańynda Sherzat Polattyń aǵasy óli tabyldy. 

Bas prokýrordyń orynbasary Ǵalymjan Qoıgeldıev Sherzat Polattyń úıiniń órtenýine qatysty tergeýdiń jańa málimetterin aıtty.