Sherzat Polattyń ólimine qatysty is sotqa qashan joldanady

ASTANA. KAZINFORM — QR Bas prokýrorynyń orynbasary Ǵalymjan Qoıgeldıev Sherzat Polattyń ólimine qatysty qylmystyq istiń materıaldarymen tanystyrý protsesine túsinik berdi.

Búgin Parlament Májilisinde ótken baspasóz máslıhatynda tilshiler Talǵardaǵy Sherzat Polattyń isine qatysty sotqa materıaldar qashan joldanatynyn surady.

Óz kezeginde Ǵ. Qoıgeldıev qazir tergeý áreketteri aıaqtalǵanyn eske saldy. Materıaldarmen tanysý júrip jatyr.

— Bul istiń materıaldarymen tanysý ýaqyty eshqandaı merzimmen shektelmeıdi. Jalpy aıtqanda, tergeý aıasynda 39 saraptama bekitildi. Sonymen qatar, jábirlenýshiler men kúdiktilerden 117 jaýap alý is-sharasy boldy. 36 ret kózbe-kóz bettestirý uıymdastyryldy. Atap aıtqanda, aýqymdy materıal qamtyldy, sondyqtan onyń bárine taldaý jasaý kerek edi. Osynyń bári zertteldi. Endi bul materıaldar tanysýǵa joldandy jáne oǵan tıisti ýaqyt qajet, — dedi Bas prokýrordyń orynbasary.

Onyń aıtýynsha, buǵan deıin ustalǵan adamdardyń sany ózgermegen.

Budan buryn habarlanǵandaı, jaqynda Sherzat Polattyń isi boıynsha tergeý aıaqtaldy.